خمار بارہ بنکوی :::: ایسا نہیں کہ اُن سے محبت نہیں رہی

[طارق شاہ]

غزل
خُماربارہ بنکوی

ایسا نہیں کہ اُن سے محبّت نہیں رہی
جذبات میں وہ پہلی سی شِدّت نہیں رہی

ضعفِ قویٰ نے آمدِ پیری کی دی نوِید
وہ دِل نہیں رہا، وہ طبیعت نہیں رہی

سر میں وہ اِنتظار کا سودا نہیں رہا
دِل پر وہ دھڑکنوں کی حکومت نہیں رہی

کمزوریِ نِگاہ نے سنجیدہ کر دیا
جَلووں سے چھیڑ چھاڑ کی عادت نہیں رہی

ہاتھوں سے اِنتقام لیا اِرتعاش نے
دامانِ یار سے کوئی نِسبت نہیں رہی

پیہم طوافِ کوچۂ جاناں کے دِن گئے
پیروں میں چلنے پھرنے کی طاقت نہیں رہی

چہرے کو جُھرّیوں نے بھیانک بنا دیا
آئینہ دیکھنے کی بھی ہمّت نہیں رہی

اللہ جانے موت کہاں مر گئی خمار
اب مُجھ کو زندگی کی ضرُورت نہیں رہی​

 

[شیزان]

بہت عمدہ انتخاب
شکریہ شاہ جی

 

[طارق شاہ]

بہت عمدہ انتخاب
شکریہ شاہ جی

تشکّر اظہار خیال اور پذیرائی پر
بہت خوش رہیں

 

[محمد بلال اعظم]

واہ
سبحان اللہ
مطلع تا مقطع غزل لاجواب ہے۔

 

[طارق شاہ]

واہ
سبحان اللہ
مطلع تا مقطع غزل لاجواب ہے۔

تشکّر اظہار خیال پر، جناب !
بہت خوش رہیں

 

[ظفری]

بہت خوب ۔ خصوصا ً مطلع اور مقطع لاجواب ہے ۔

 

[طارق شاہ]

بہت خوب ۔ خصوصا ً مطلع اور مقطع لاجواب ہے ۔

تشکّر ظفری صاحب اظہار خیال کے لئے
خمار صاحب کا شمار جیدالخیال شعرا میں ہوتا ہے جیسا
کہ بالا غزل سے بھی ظاہر ہے۔

ہم ٥ اور ٦ اگست کو آپکی ریاست کے دارالخلافہ سپرنگ فیلڈ اور متصل شہر پیوریا میں ہوں گے
شکاگو آتے تو ضرور آپ سے ملتے، پچھلے سال آئے تھے ۔ جب آپ کا نہیں پتہ تھا
یہاں واشنگٹن ڈی سی آنا ہو تو ضرور ملئے گا

 

[ظفری]

ارے واہ ۔۔ تو آپ یہاں رہائش پذیر ہیں ۔ جان کر بہت خوشی ہوئی ۔ اتفاق سے میری بھی آمد 2 سے 3 اگست کے درمیان ورجینا میں متوقع ہے ۔ آپ ڈی سی میں کہاں ہوتے ہیں ۔

 

[طارق شاہ]

ورجینیا میں ہی ہوں واشنگٹن سے ١٨ میل کے فاصلے پر

پہلے نکل آئیں تو ملاقات ہو سکتی ہے روزہ کھولنے کا وقت ہوا چاہتا ہے
کھلنے کے بعد بات ہوگی آپ سے

 

[کاشفی]

واہ بہت ہی عمدہ جناب! شیئر کرنے کے لیئے شکریہ۔۔۔
جیتے رہیئے۔۔۔

​