ایک آشوبیہ ۔۔۔۔ خالد علیم

[نوید صادق]

خالد علیم

ایک آشوبیہ​

(بارگاہِ خدا میں)​

تجھ سے میرے خدا کہوں کیا
حالِ دلِ مبتلا کہوں کیا

جس حال میں ہوں، تجھے خبر ہے
بندہ ہوں میں ترا، کہوں کیا

میں ایک حصارِ عقل میں ہوں
تو سوچ سے ماورا، کہوں کیا

آتی ہے صدا پرندگاں کی
دیتی ہے ترا پتا، کہوں کیا

میں عجز سرشت، سر بہ خم ہوں
ہے عجز مری اًنا، کہوں کیا

تو لامتناہی و دوامی
زیبا ہے مجھے فنا، کہوں کیا

بے مایہ و کم نظر ہوں لیکن
تو جانتا ہے، بھلا کہوں کیا!

جیسا ہوں اور جس قدر ہوں
خود کو خود سے سَوا کہوں کیا

ہو جاﺅں نہ دُھول رہ گزر کی
کب سے ہوں شکستہ پا، کہوں کیا

ملتی ہی نہیں یقیں کی منزل
کیوں تنگ ہے راستہ، کہوں کیا

اس فکر میں ہوں کہ کھل نہ جائے
دل کا بندِ قبا، کہوں کیا

سب ایک سے، سب ہی ایک سے ہیں
ناآشنا، آشنا کہوں کیا

ایک ایک کو دیکھتا ہوں لیکن
ایک ایک ہے آئنہ، کہوں کیا

جب سب کا مزاج سرد خو ہے
کیوں سب ہیں خدا نما، کہوں کیا

سینوں میں وہی فشار دَم کا
سب کچھ ہے وہی، نیا کہوں کیا

جب میری نگاہ دیکھتی ہے
پھر دوسروں سے سُنا کہوں کیا

سب لوگ ہیں اپنے حال میں گم
کس کا ہے حال کیا؟ کہوں کیا

اس شہر میں کیا ہَوا چلی ہے
اور سب کی ہے کیا ادا، کہوں کیا

اس شہر پہ کیا گزر گئی ہے
اس شہر کا ماجرا کہوں کیا

یہ شہر اُجاڑ ہو گیا ہے
جنگل ہے ہرا بھرا، کہوں کیا

پت جھڑ ہو، یا بہار کا دَور
خوشبو ہے گریز پا، کہوں کیا

ہر پھول ببول ہو گیا ہے
یوں بھی یہ چمن کِھلا! کہوں کیا

کیوں چاک ہے دامنِ سحرگاہ
حیران ہے کیوں صبا، کہوں کیا

کم کم سی دِیوں میں جان کیوں ہے
ویرانیِ شب سرا کہوں کیا

دل کی ہے یا جہان کی ہے
کس کس کی ہے کیا خطا، کہوں کیا

گم کردہ¿ راہ پھر رہا ہے
ہر کوئی جدا جدا، کہوں کیا

تارِ رگِ جاں کٹا ہوا ہے
رشتوں میں نہیں وفا، کہوں کیا

آنکھوں سے اُتر کے دل تک آئے
کون ایسا ہے دل ربا، کہوں کیا

کیوں دستِ دعا تہی رہا ہے
کیا تھا مرا مُدّعا، کہوں کیا

یا دَم ہی نہیں سماعتوں میں
یا ٹوٹ گئی صدا، کہوں کیا

اب بھی ہے، جو غم تھا اس سے پہلے
اب بھی ہے، جو حال تھا، کہوں کیا

اب تک نہیں کھل سکا یہ عقدہ
میں کون ہوں اور کیا، کہوں کیا

اب تک نہیں ہو سکا ہوں آباد
آیا تھا لٹا پٹا، کہوں کیا

سَر پر نہیں آسمان اپنا
میں حال زمین کا کہوں کیا

پھیلا ہے کرن کرن اندھیرا
سورج ہے چراغ پا، کہوں کیا

اُترا ہے لہو لہو سویرا
قاتل ہے سحر نما، کہوں کیا

ہر صبح صباحتوں کی دشمن
ہر رات ہے رتجگا، کہوں کیا

دن بھر گئے تیرہ باطنوں سے
احوالِ شبِ عزا کہوں کیا

اس شہر کے زادگانِ ظلمت
ہیں وقت کے ناخدا کہوں کیا

آماجگہِ فسادِ زر ہے
دنیا کو بُرا بھلا کہوں کیا

دہشت سے بدن لرز رہا ہے
انسان بہک گیا، کہوں کیا

خالی ہے ظرف مے کدے کا
ہے ساری زمیں خلا، کہوں کیا

کیا کچھ ہے عمل کی پوٹلی میں
جب دل ہے گرہ کشا، کہوں کیا

ایماں تھا چراغ میرے گھر کا
یہ کس نے بجھا دیا، کہوں کیا

جو سچ کبھی نور تھا نظر کا
شاید کہیں کھو گیا، کہوں کیا

جاں رہن ہے زر کی جستجو میں
احساس تو لٹ گیا، کہوں کیا

تیرے بندوں کو میرے مولا!
دی وقت نے کیا سزا؟ کہوں کیا

سچوں کی جاں لہو لہو ہے
جھوٹوں پہ ہوئی عطا، کہوں کیا

ہیں وقت کے اہلِ جرم خوش حال
اب جرم کو ناروا، کہوں کیا

غارت گرِ قلب و جاں بہت ہے
ہر ایک ستم ادا، کہوں کیا

شمشیر بدست ہے زمانہ
ہر ایک ہے سرپھرا، کہوں کیا

شہ زور کے ہاتھ میں ہے سب کچھ
کمزور کی میں خطا، کہوں کیا

افلاس ہے گیان دھیان میں گم
دولت ہے مہاتما، کہوں کیا

ناقوں پہ سوار جہلِ دُنیا
دانش ہے پیادہ پا، کہوں کیا

ماحول میں حبسِ دم ہے ایسا
جیسے دَم گھٹ گیا، کہوں کیا

رُخصت ہوئے بندگانِ عالی
تو ہے رَبُّ العلیٰ، کہوں کیا

آنکھیں ہیں گزشتگاں کی جانب
دل کی وحشت سرا، کہوں کیا

تحلیل ہَوا میں ہو گیا ہے
کس کس کا غبارِ پا؟ کہوں کیا

ملتا نہیں مجھ سے بے خبر کو
اپنا ہی اَتا پتا، کہوں کیا

زندہ ہوں، مثالِ مرُدگاں ہوں
کب تک میں جی چکا، کہوں کیا

یہ زندگی جاں کو آ گئی ہے
اچھا! میرے خدا! کہوں کیا

اے میرے خدا معاف کر دے
جو کچھ بھی کہا، کہا کہوں کیا

ہر موڑ پہ بندشِ زباں ہے
ہے سانحہ، سانحا کہوں کیا

خالد چپ، چپ ہے جانِ خالد
کب شور ہوا بپا، کہوں کیا​

(خالد علیم)​

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مطبوعہ: ماہنامہ بیاض، لاہور
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[فاتح]

آہ! ایک رقت آمیز شہر آشوب!
شکریہ نوید صادق صاحب!

 

[فرخ منظور]

اب تک نہیں کھل سکا یہ عقدہ
میں کون ہوں اور کیا، کہوں کیا

بہت عمدہ آشوبیہ ہے۔ شکریہ نوید صاحب!

 

[الف عین]

بہت اچھے، خلد علیم واقعی اچھے شاعر ہیں۔ لیکن کیا یہ بغداد آشوب میں شامل ہے نوید؟

 

[نوید صادق]

بہت اچھے، خلد علیم واقعی اچھے شاعر ہیں۔ لیکن کیا یہ بغداد آشوب میں شامل ہے نوید؟

اعجاز بھائی،
یہ آشوبیہ بغداد آشوب کے بعد کا ہے۔
میں رخصت پر لاہور آ یاہوں۔ اب بغداد آشوب بھی مکمل بھیج دوں گا۔ کل خالد علیم صاحب سے ملاقات طے ہے۔ ان سے مکمل کاپی مل جائے گی۔

 

[عمران شناور]

بہت شکریہ جناب نوید صادق صاحب۔ بہت عمدہ نظم پیش کی ہے خالد علیم صاحب کی۔
کل ملاقات ہوئی تھی ان سے اور ’غزلو غزلی‘ بھی ہوئے آج انشاء اللہ یہ نظم ’کلامِ شاعر بزبانِ شاعر‘ سنی جائے گی

 

[mfdarvesh]

بہت شکریہ کیا بات ہے

 

[مغزل]

کیا کہنے واہ ، جواب نہیں ، اپنی خاص حسیت ہے نظم کی واہ ۔ خالد صاحب کو سلام