ایک تاریخ مقرر پہ تو ہر ماہ ملے عمیر نجمی

[مومن فرحین]

ایک تاریخ مقرر پہ تو ہر ماہ ملے
جیسے دفتر میں کسی شخص کو تنخواہ ملے

رنگ اکھڑ جائے تو ظاہر ہو پلستر کی نمی
قہقہہ کھود کے دیکھو تو تمہیں آہ ملے

جمع تھے رات مرے گھر ترے ٹھکرائے ہوئے
ایک درگاہ پہ سب راندۂ درگاہ ملے

میں تو اک عام سپاہی تھا حفاظت کے لئے
شاہ زادی یہ ترا حق تھا تجھے شاہ ملے

ایک اداسی کے جزیرے پہ ہوں اشکوں میں گھرا
میں نکل جاؤں اگر خشک گزر گاہ ملے

اک ملاقات کے ٹلنے کی خبر ایسے لگی
جیسے مزدور کو ہڑتال کی افواہ ملے

گھر پہنچنے کی نہ جلدی نہ تمنا ہے کوئی
جس نے ملنا ہو مجھے آئے سر راہ ملے

عمیر نجمی

 

[اکمل زیدی]

واہ واہ خوب انتخاب بس موضوع کی ہیڈ لائین دیکھ کر ہم آگئے کچھ کوما شوما ڈال دیں۔۔۔

ایک تاریخ مقرر پہ تو ہر ماہ ملے عمیر نجمی

 

[مومن فرحین]

چلیں اسی طرح باقی سب بھی آجائیں گے ۔۔۔

 

[اکمل زیدی]

چلیں اسی طرح باقی سب بھی آجائیں گے ۔۔۔

میں تو سمجھا کہ شاید آپ نے چوڑی اور پھول والے کو disclose کر دیا۔۔۔
معذرت ازراہ تفنن سمجھیے گا۔۔۔

 

[محمد احسن سمیع راحلؔ]

سبحان اللہ ۔۔۔ سمجھ نہیں آرہا کہ اردو محفل پر ہی ہوں، یا جنگ اخبار کی ویب سائٹ کھلی ہوئی ہے۔
تنخواہ، ہڑتال، عوام، سپاہی ۔۔۔ سبھی کچھ تو ہے

 

[مومن فرحین]

اسی بہانے اردو محفل پر اخبار کا لطف بھی حاصل کریں۔۔ ۔

سرگوشی

غم اخبار غم یار میں شامل کر لو

 

[مومن فرحین]

میں تو سمجھا کہ شاید آپ نے چوڑی اور پھول والے کو disclose کر دیا۔۔۔
معذرت ازراہ تفنن سمجھیے گا۔۔۔

پگار ہی نہیں ہوئی تو فائدہ کیا ۔۔۔

 

[محمد تابش صدیقی]

ایک تاریخ مقرر پہ تو ہر ماہ ملے
جیسے دفتر میں کسی شخص کو تنخواہ ملے

کتنوں کو تو تنخواہ بھی وقت پر نہیں ملتی۔ ضرور کسی اچھے ادارے میں عمیر نجمی صاحب ملازمت کرتے ہیں۔

آج کل کے شعرا میں عمیر نجمی بہتر لکھنے والوں میں سے ہیں۔

 

[محمد احسن سمیع راحلؔ]

آج کل کے شعرا میں عمیر نجمی بہتر لکھنے والوں میں سے ہیں۔

جس مشاعرے کی وڈیو میں یہ غزل میں نے سنی تھی، وہاں ان کے مقابل قبلہ علی زریون اور جناب تہذیب حافی تھے ۔۔۔ شاید اس لیے ہیڈلانی اسلوب اختیار کرگئے موصوف

 

[محمد تابش صدیقی]

جس مشاعرے کی وڈیو میں یہ غزل میں نے سنی تھی، وہاں ان کے مقابل قبلہ علی زریون اور جناب تہذیب حافی تھے ۔۔۔ شاید اس لیے ہیڈلانی اسلوب اختیار کرگئے موصوف

پھر تو بالکل ٹھیک 'کرا'

 

[مومن فرحین]

تابش بھائی راحل بھائی پر مجھے عمیر نجمی کا کلام بہت اچھا لگتا ہے

 

[محمد تابش صدیقی]

تابش بھائی راحل بھائی پر مجھے عمیر نجمی کا کلام بہت اچھا لگتا ہے

جی۔ یہی کہا کہ ان کا کلام بہتر ہے موجودہ شعراء میں۔

 

[محمد عدنان اکبری نقیبی]

جمع تھے رات مرے گھر ترے ٹھکرائے ہوئے
ایک درگاہ پہ سب راندۂ درگاہ ملے

واہ ،
زبردست شعر اور عمدہ انتخاب

 

[مومن فرحین]

عدنان جی بڑے دنوں بعد نظر آئے آپ

 

[محمد احسن سمیع راحلؔ]

تابش بھائی راحل بھائی پر مجھے عمیر نجمی کا کلام بہت اچھا لگتا ہے

یہ کوئی قابلِ اعتراض بات نہیں بہن ۔۔۔ ضروری نہیں کہ دو لوگوں کا ذوق ایک جیسا ہو۔ پھر عمر کے ساتھ ساتھ ذوق بھی ’’اپڈیٹ‘‘ ہوتا رہتا ہے۔
ایک زمانے میں ہمیں وصیؔ شاہ ’’ٹاپ‘‘ کے شاعر لگتے تھے ۔۔۔ پھر انورؔ مقصود صاحب کے ’’ہاف پلیٹ‘‘ کی وساطت سے معلوم ہوا کہ ٹاپ تو گھوڑوں کی ہوتی ہے

 

[محمد احسن سمیع راحلؔ]

ویسے عمیر، تہذیب وغیرہ ابھی نوجوان ہی کہلائے جائیں گے سو ان کو عمر کا ’’بینیفٹ‘‘ دیا جاسکتا ہے۔ مرحوم ظفر اقبالؔ تو آخر تک اس صنف کے علمبردار بنے رہے جسے مکرمی و استاذی سرورؔ عالم راز صاحب نے ’’گجل‘‘ قرار دیا ہے۔

Sarwar Alam Raz Sarwar -- Articles | ادبی مضامین

 

[محمد عدنان اکبری نقیبی]

عدنان جی بڑے دنوں بعد نظر آئے آپ

بہنا ہم ہوتے تو محفل پر ہی ہیں،
مگر آج کل خود کو محفل کے جن اور بھوت میں شامل کر رکھا ہے۔

 

[رومی]

لاريب اخلاص

 

[لاريب اخلاص]

کوئی شک نہیں سر عمیر نجمی ایک اچھے شاعر ہیں۔
کتاب عشق میں ہر آہ ایک آیت ہے
پر آنسوؤں کو حروف مقطعات سمجھ
عمیر نجمی

 

[محمد وارث]

مرحوم ظفر اقبالؔ تو آخر تک اس صنف کے علمبردار بنے رہے جسے مکرمی و استاذی سرورؔ عالم راز صاحب نے ’’گجل‘‘ قرار دیا ہے۔
Sarwar Alam Raz Sarwar -- Articles | ادبی مضامین

اللہ خیر۔ یہ ظفر اقبال کب مرحوم ہو گئے!