ایک مضمون تو کیا‘ نُطق وبیاں تک لے جائیں ۔۔۔ خالد علیم

[نوید صادق]

غزل

ایک مضمون تو کیا‘ نُطق وبیاں تک لے جائیں
کاٹ کر اہلِ سخن میری زباں تک لے جائیں

کبھی گزرا ہی نہ ہو جیسے گزرگاہ سے دل
لوگ آئیں‘ مرے قدموں کے نشاں تک لے جائیں

تجھ پہ کُھل جائے گا خوش خوابیِ جاں کا مفہوم
آ تجھے رہ گزرِ دل زدَگاں تک لے جائیں

ایک دریائے رواں آنکھ کے اُس پار بھی ہے
آ تجھے ہم اُسی دریائے رواں تک لے جائیں

آ کہ ہم موج کی لرزش میں بھرے بیٹھے ہیں
آ تجھے سینہء قلزم کی اماں تک لے جائیں

دل اکیلا ہے سرِ انجمنِ آئینہ
عکس اُبھریں تو مری تاب و تواں تک لے جائیں

کسی تعبیر کے اِمکان سے پہلے خالد
کیا خبر ہے کہ مرے خواب کہاں تک لے جائیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خالد علیم
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شکریہ ماہنامہ بیاض، لاہور

 

[فرخ منظور]

واہ واہ۔ یہ بھی بہت خوب غزل ہے۔ شکریہ نوید صاحب۔ داد ضرور پہنچا دیجیے گا۔

 

[شاہ حسین]

بہت اچھا انتخاب ہے شکریہ جناب نوید صاحب ۔

 

[عمران شناور]

خالد صاحب کی غزل شیئر کرنے کے لیے بہت بہت شکریہ نوید بھائی بہت اچھی غزل ہے۔

 

[کاشفی]

بہت ہی خوب۔۔

 

[مغزل]

حیرت ہے ۔۔

 

[کاشفی]

حیرت ہے ۔۔

کس بات کی حیرت؟

 

[نوید صادق]

واہ واہ۔ یہ بھی بہت خوب غزل ہے۔ شکریہ نوید صاحب۔ داد ضرور پہنچا دیجیے گا۔

بھائی جان!
آپ مجھ سے خالد علیم صاحب کا نمبر لے لیں۔ اگر میں آپ کی کہی گئی دادیں پہنچانی شروع کر بیٹھا تو سارا دن یہی کام کرتا رہا ہوں گا۔ اور نئی غزلیں کیسے ٹائپ کروں گا۔

 

[نوید صادق]

حیرت ہے ۔۔

کیوں کیا ہوا، کس بات پر حیرت ہے ہمارے بھائی کو!!!

 

[محمد وارث]

لاجواب، بہت خوبصورت غزل ہے نوید صاحب، شکریہ، اور میری داد بھی پہنچائیں

 

[فرخ منظور]

بھائی جان!
آپ مجھ سے خالد علیم صاحب کا نمبر لے لیں۔ اگر میں آپ کی کہی گئی دادیں پہنچانی شروع کر بیٹھا تو سارا دن یہی کام کرتا رہا ہوں گا۔ اور نئی غزلیں کیسے ٹائپ کروں گا۔

ٹھیک ہے حضور یہی کرتا ہوں۔ خود ہی پہنچا دیتا ہوں۔

 

[مغزل]

کس بات کی حیرت؟

کاشفی صاحب میری ’’ حیرت ‘‘ پر چنداں ’’ حیرت ‘‘ کی ضرورت نہیں ۔کہ ’’ حیرت ‘‘ تو ’’ حیرت ‘‘ ہی ہوتی ہے نا ۔۔

آپ مجھ سے خالد علیم صاحب کا نمبر لے لیں۔

بابا صاحب، ہمیں بھی ایس ایم ایس کردیں۔

کیوں کیا ہوا، کس بات پر حیرت ہے ہمارے بھائی کو!!!

’’ حیرت ‘“ کی بات یہ کہ ایسا صاف ستھرا نتھرا ہوا ،بے پناہ ، صاحبِ اسلوب اور مثبت رویو ں کا شاعر پہلے ہمیں کیوں نہ میسر آیا۔
اور ہم کیوں‌محروم رہے ، حیرت اس بات کی دوستوں نے ان کی غزل کو سرسری کیسے لیا ، حیرت اس بات کی کہ ہم حیرت میں پڑ گئے کہ کیا لکھیں۔

خیر ۔۔۔ مزید کلام کے بعد ہی کچھ عرض کروں‌گا۔

 

[فرخ منظور]

خیر ۔۔۔ مزید کلام کے بعد ہی کچھ عرض کروں‌گا۔

مغل صاحب، خالد علیم صاحب کے مزید کلام کے لئے یہاں دیکھیے۔

 

[مغزل]

بہت بہت شکریہ سخنور بھائی ، سدا سلامت شاد باد

 

[نوید صادق]

خالد علیم صاحب سے اتوار کی اتوار ملاقات ہو جاتی ہے۔ آپ سب احباب کے جذبات ان تک پہنچا دیے جائیں گے۔

 

[فرخ منظور]

خالد علیم صاحب سے اتوار کی اتوار ملاقات ہو جاتی ہے۔ آپ سب احباب کے جذبات ان تک پہنچا دیے جائیں گے۔

حضور آدھے جذبات مجھے اٹھوا دیجیے گا ۔ کچھ میں بھی تو ان تک پہنچا سکوں۔

 

[نوید صادق]

آپ کو آج ان کا نمبر دے دوں گا۔