میر اے تو کہ یاں سے عاقبتِ‌ کار جائے گا - میر تقی میر

[فرحان محمد خان]

اے تو کہ یاں سے عاقبتِ‌ کار جائے گا
غافل نہ رہ کہ قافلہ اک بار جائے گا

موقوف حشر پر ہے سو آتی بھی وہ نہیں
کب درمیاں سے وعدہء دیدار جائے گا

چُھوٹا جو میں قفس سے تو سب نے مجھے کہا
بے چارہ کیوں کے تاسرِ‌دیوار جائے گا

دے گی نہ چین لذتِ زخم اُس شکار کو
جو کھا کے تیرے ہاتھ کی تلوار جائے گا

تدبیر میرے عشق کی کیا فائدہ طبیب
اب جان ہی کے ساتھ یہ آزار جائے گا

آئے بِن اُس کے ، حال ہوا جائے ہے تغیر
کیا حال ہوگا پاس سے جب یار جائے گا

کوچے میں اُس کے رہنے سے باز آ وگرنہ میرؔ
اک دن تجھے وہ جان سے بھی مار جائے گا​

میر تقی میر​

 

[فرخ منظور]

موقوف حشر پر ہے سو آتی بھی وہ نہیں
​

موقوف حشر پر ہے سو آتے بھی وے نہیں