سیدہ شگفتہ
لائبریرین
اے رات نہ ڈھلنا کہ اجڑ جائے گی زینب
بھائی سے دم صبح بچھڑ جائے گی زینب
سونے دے سکینہ کو کہ پھر سو نہ سکے گی
رونا بھی جو چاہے گی تو پھر رو نہ سکے گی
اصغر سے ملاقات تو پھر ہو نہ سکے گی
اے رات نہ ڈھلنا کہ اجڑ جائے گی زینب
باقی ہے فقط آل محمد کا سفینہ
بیٹی کے سلانے کو ہے شبیر کا سینہ
جھولا علی اصغر کا جھولاتی ہے سکینہ
اے رات نہ ڈھلنا کہ اجڑ جائے گی زینب
کل کون سنے گا میری آہ و بکا بھی
ہو گا تہہ خنجر میرے بھائی کا گلا بھی
خیمہ تو کجا سر پہ نہ ہو گی یہ ردا بھی
اے رات نہ ڈھلنا کہ اجڑ جائے گی زینب
ہر چند کہ بچوں کی ابھی پیاس ہے باقی
کچھ آنکھ میں حسرت ہے تو کچھ آس ہے باقی
لیکن میرا بھائی ، میرا عباس ہے باقی
اے رات نہ ڈھلنا کہ اجڑ جائے گی زینب
اے رات بکھر جا تیرے بس میں ہے جہاں تک
مٹ جائیں گے کل آل نبی کے نشاں تک
باقی ہے یہ منظر علی اکبر کی اذاں تک
اے رات نہ ڈھلنا کہ اجڑ جائے گی زینب
(صاحب کلام: نامعلوم)
