پیر فضل گجراتی ' بستر '

[تلمیذ]

اج تیک نئیں کسے نے کرن دتا ساینوں اویدی دیوار دے کول بستر
ملی جگہ نہ کسے نوں بسترے دی ایتھےکئیاں دے ہو گئے نیں گول بستر
دن رات بس ایہائی شغل رہندائے کدی ٹھپ بستر کدی کھول بستر
فضل جنہاں دے سُتیاں یار لد گئے سسّی وانگ روندے پھول پھول بستر

----------

وٹک کسے دی جانی اے کیہہ وٹی لوک خوشی دے نال برسان وٹے
تیرے در توں وٹانی اے جگہ کنہیں جم جم گھُوریاں پیا دربان وٹے
اوہناں واسطے مہنے نہ کوئی وٹے تیرے عشق وچ جو چر وان وٹے
وٹیا کُجھ نٕیں جگ تے فضل اوہناں رئے جنہاں دے نال جانان وٹے

----------

پیر فضل گُجراتی

 

[محمد وارث]

واہ جی واہ بہت ای اعلٰی۔ کیا بات ہے جی پیر فضل گجراتی ہوراں دی۔ انہاں دی شاعری میں اپناآرگ ڈاٹ کام تے پہلی واری پڑی سی تے بہت ہی پسند آئی سی۔

بہت شکریہ تہاڈا انہاں دا کلام پیش کرن لئی۔ مہربانی۔

 

[تلمیذ]

جناب وارث صاحب شکریہ پیر صاحب دی قدر دانی دا۔ ایہہ دو بیتیاں اونہاں دی کتاب 'ٹکوراں' توں لئیاں نیں جِدھے پِچھے پنجابی دو بیتی یعنی رباعی دے بادشاہ ڈاکٹر فقیر مرحوم دا ایہہ شعر درج اے :

فنِ شعر دے کول جواب جد کوئی اوہدی غزل تے میری رباعی دا نئیں
کیوں نئیں غزل پنجابی دا فضل حافظ ، تے فقیر میں عمر خیام کیوں نئیں

پیر صاحب بلا شک پنجابی دے حافظ شیرازی سن۔ اونہاں دی غزلاں دی کتاب 'ڈُونگھے پینڈے' پنجابی ادب دا سرمایہ اے۔

ضِمنآ اک گل یاد آ ؔگئی اے - ایس کتاب ' ٹکوراں' تے مُل فقط تِن روپے لِخیا ہویا اے۔ طبع شدہ 1970 ۔ کیہہ تسیں اج دے دور وِچ 120 صفحے دی کتاب اینے وچ خریدن بارے سوچ سکدے او؟ روپیہ کِِنا بے وقعت ہو گیا اے !!

 

[فرحت کیانی]

:واہ: :واہ: بہت خوب