بلاگ ایوارڈز - مشک آں است کہ خود ببوید۔۔۔

[مغزل]

چلیں ہم بھی قسمت آزماتے ہیں ۔۔

 

[محمد وارث]

برادرم محمد وارث کا خوبصورت ادبی بلاگ کسی ستائش کا محتاج نہیں۔ لیکن کیا وہ اس انگریزی کمیونٹی سے اردو ادب کے ایک بلاگ کے لئے ستائش وصول کرنا چاہیں گے؟ جج صاحبان کون لوگ ہیں ؟ کیا ان میں سے کوئی اردو ادب کا ذوق یا کم سے کم کچھ واقفیت ہی رکھتا ہے؟

شکریہ عثمان صاحب۔

اس سلسلے میں برادرم محمود مغل صاحب کی باتوں سے مجھے مکمل اتفاق ہے۔

بات نہ تو ستائش کی ہے، کہ اس سے میرے سر پر کون سے سینگ اُگ آئیں گے اور نہ ہی کوئی سرخاب کے پر لگ جائیں گے اور نہ صلے کی کہ بخوبی جانتا ہوں کہ مآلِ عشق و عاشقی کیا ہے۔

اور نہ ہی مجھے نام نہاد انگریزی کمیونٹی سے کوئی پُرخاش ہے اور ہو بھی کیوں، وہ ہمارا کیا بگاڑ رہے ہیں، آخر وہ بھی اس ملک سے کوئی نہ کوئی نسبت رکھتے ہیں اور بہت اچھا کرتے ہیں کہ انگریزی میں لکھتے ہیں، اگر ان میں سے کوئی اردو میں بھی لکھنا شروع ہو جائے تو یہ اس کا اایک اچھا کام ہوگا، لیکن یہ کسی پر فرض تو نہیں ہے بھائی کہ وہ اردو ہی میں لکھے۔

اور ذرا اپنے دل پر ہاتھ رکھ کر کہیے، اردو بلاگنگ کا معیار کیا ہے؟ کوئی معیار ہے بھی یا نہیں؟ اب میں منہ کھولوں گا تو انگریزی محاروے کے مطابق اپنے ہی گندے کپڑے سرِ بازار دھونے کیلیے رکھ دؤں گا لیکن ہم سب جانتے ہیں کہ اردو بلاگنگ کیسی ہے معدودے چند بلاگز کے، تمام کے تمام اردو بلاگز سوختنی ہیں، ٹھٹہ، ہزلیات، فخش، گھٹیا سیاست بازی اور روایتی مذہب بازی اسکے سوا اور کیا ہے؟ اور شاید میرا اپنا بلاگ بھی ایسا ہی ہے، کام نہ کاج کا دشمن اناج کا

اور پھر نام نہاد اردو کمیونٹی کی جس کی تعداد انگلیوں کے دونوں پوروں پر گنی جا سکتی ہے وہ اس سلسلے میں کیا کرتی ہے، ظاہر ہے کچھ بھی نہیں سوائے لڑنے جھگڑنے کے اور ایک دوسرے پر طنز و طعنے کے تیر چلانے کے۔

اب رہا مسئلہ وہاں پر حاضری دینے کا تو اس میں کیا برائی ہے؟ کیا جو نہیں جانتے ان کو نہ بتایا جائے کہ اردو میں بھی کچھ نہ کچھ اچھا کام ہو رہا ہے کہ دم سادھے بیٹھے رہیں۔ سو مجھے تو اس میں کچھ برائی نظر نہیں آتی کہ کچھ مزید لوگوں تک اردو کا پیغام پہنچایا جائے، کچھ مزید لوگوں کو بتایا جائے کہ اردو میں بھی بلاگ اور اچھے اور معیاری بلاگز بن سکتے ہیں۔

اوپر اردو بلاگز اور اردو بلاگنگ کے متعلق میں نے جو کچھ لکھا وہ واقعی حقیت ہے، لیکن اس حقیقت کے باوجود میری اردو سے محبت پر کوئی فرق نہیں پڑتا۔ میں نے جب اپنا بلاگ لکھنے کا فیصلہ کیا تھا تو ایک عرصے تک سوچتا رہا تھا کہ انگریزی میں شروع کروں یا اردو میں اور پھر بعد میں بھی جب میرے اردو بلاگ کو کئی ایک چرکے لگے تو میں تائب ہونے کے بارے میں سوچتا رہا لیکن ہر بار یہی سوچ کر کہ نہیں اردو کو بھی لوگوں تک پہنچنا چاہیئے، اردو ہی میں لکھتا رہا اور یقین مانیے یہی واحد مقصد تھا جس کے تحت میں نے اپنا بلاگ وہاں دے دیا۔

یہ ایوراڈز ایک اچھا اور مستحسن کام ہے اسکے باوجود یہ ایوارڈ کوئی اتنا بڑا اور اہم نہیں ہے کہ اس پر اصولی اور بنیادی قسم کے سوال اٹھائے جائیں، لیکن کیا صرف اس بات کو بنیاد بنا کر کہ اس کو منقعد کرنے والے انگریزی میں بلاگنگ کرتے ہیں، اردو کی ترویج و اشاعت سے ہی دستبردار ہوا جائے؟

 

[محمدصابر]

محمد وارث

اس سلسلے میں برادرم محمود مغل صاحب کی باتوں سے مجھے مکمل اتفاق ہے۔

برادرم م م مغل صاحب کے کس مراسلے سے

 

[مغزل]

صابر بھائی ناصبوری کا شکار نہ ہوں ۔۔
یا تو وارث صاحب سے سہو ہوا لکھنے میں (اگر مذکورہ لڑی کی بابت بات ہے تو)
وگرنہ مجھ کم حیث نے ابتدائے اظہاریہ نویسی میں کوئی ایسا مقدمہ جو مجھے یاد پڑتا ہے قائم کیا تھا (اس حوالے سے ذکر ہے)۔۔
اورممکن ہے اسی بابت اشارہ ہو۔۔ وگرنہ میں غریب الدیار کہاں صابر کہاں شاکر۔۔ میں تو جھٹ منھ پھٹ جہل مرتبت ہوں ۔

 

[محمد وارث]

محمد وارث

برادرم م م مغل صاحب کے کس مراسلے سے

صابر بھائی ناصبوری کا شکار نہ ہوں ۔۔
یا تو وارث صاحب سے سہو ہوا لکھنے میں (اگر مذکورہ لڑی کی بابت بات ہے تو)
وگرنہ مجھ کم حیث نے ابتدائے اظہاریہ نویسی میں کوئی ایسا مقدمہ جو مجھے یاد پڑتا ہے قائم کیا تھا (اس حوالے سے ذکر ہے)۔۔
اورممکن ہے اسی بابت اشارہ ہو۔۔ وگرنہ میں غریب الدیار کہاں صابر کہاں شاکر۔۔ میں تو جھٹ منھ پھٹ جہل مرتبت ہوں ۔

میرے خیال میں میرے مراسلے سے کچھ مغالطہ ہوا ہے اس سلسلے میں، میں یہ عرض کرنا چاہ رہا تھا کہ محمود صاحب نے اردو کے متعلق اور اس ایوارڈ کے متعلق یہاں جو لکھا ہے مجھے اس سے اتفاق ہے، اور شاید میں بھی وہی بات کہہ رہا ہوں جو مغل صاحب کہہ رہے ہیں۔

 

[نبیل]

کسی زمانے میں منظرنامہ والوں نے اردو بلاگ ایوارڈز کا اجراء کرکے ایک اچھا قدم رکھا تھا، لیکن اس کے بعد منظرنامہ بھی قصہ پارینہ بن گیا ہے۔ ہمارے لیے یہ بھی ممکن ہے کہ ہم اس سلسلے کو اردو ویب کی زیر نظامت چلائیں، لیکن منظرنامہ کا فائدہ یہ تھا کہ اس کی اردو ویب سے علیحدہ حیثیت تھی اور یوں یہ غیرجانبدار حیثیت میں کام کرتا تھا۔ اگر یہ سلسلہ بحال ہو سکے تو اس سے بھی اردو بلاگنگ کو فائدہ پہنچ سکتا ہے۔

 

[ابوشامل]

جہاں تک میں نے مختلف گروپوں اور محفلوں پر ہونے والی گفتگو کو پایا ہے، یار لوگوں نے اس بلاگ ایوارڈ کو کچھ زیادہ ہی سنجیدہ لے لیا ہے اسے صرف اس حد تک سنجیدہ لینے کی ضرورت ہے کہ اس کے ذریعے آپ کو اپنے بلاگ کی ترویج کا موقع ملے گا۔ ہاں اگر لگے ہاتھوں ایوارڈ مل جائے تو اس سے اور زیادہ تشہیر ہوگی۔ خصوصاً آپ کے بلاگ کا تعارف کرواتے ہوئے جب یہ کہا جائے کہ یہ پاکستان بلاگ ایوارڈ کے فلاں زمرے میں بہترین بلاگ کا اعزاز جیت چکے ہیں، لوگوں پر بہت اچھا تاثر قائم کرتا ہے۔
باقی ووٹنگ اور جیوری کی ساکھ اور منتخب کرنے کی صلاحیت کے بارے میں میں کچھ نہیں کہنا چاہوں گا۔ اردو بلاگز کو وہ کتنے غور سے پڑھتے ہیں اس کا اندازہ اس بات سے لگا لیں کہ 'بہترین مزاحیہ بلاگ' کے زمرے میں گزشتہ سال جعفر کا بلاگ 'حال دل' ہار گیا۔ اس لیے میری ذاتی رائے میں یہی مناسب ہے کہ تمام اچھے اردو بلاگز ایک ہی زمرے یعنی 'بہترین اردو بلاگ' میں مقابلہ کریں۔ دیگر زمروں میں اچھے بلاگز کے جانے کا مطلب ہے کہ 'اردو بلاگ' کے زمرے میں محض گنے چنے اچھے اور بیشتر ناقص بلاگز موجود رہیں گے جس سے اردو بلاگز کا اچھا تاثر قائم نہیں ہوگا۔ یہی وجہ ہے کہ چاہتے ہوئے بھی میں نے کرک نامہ کی نامزدگی بہترین اردو بلاگ کے زمرے میں کروائی۔

 

[ابوشامل]

کسی زمانے میں منظرنامہ والوں نے اردو بلاگ ایوارڈز کا اجراء کرکے ایک اچھا قدم رکھا تھا، لیکن اس کے بعد منظرنامہ بھی قصہ پارینہ بن گیا ہے۔ ہمارے لیے یہ بھی ممکن ہے کہ ہم اس سلسلے کو اردو ویب کی زیر نظامت چلائیں، لیکن منظرنامہ کا فائدہ یہ تھا کہ اس کی اردو ویب سے علیحدہ حیثیت تھی اور یوں یہ غیرجانبدار حیثیت میں کام کرتا تھا۔ اگر یہ سلسلہ بحال ہو سکے تو اس سے بھی اردو بلاگنگ کو فائدہ پہنچ سکتا ہے۔

بالکل درست فرمایا نبیل بھائی۔ منظرنامہ ایک بہت ہی زبردست کوشش تھی۔ لیکن اسے وہی مسئلہ درپیش رہا جو اردو کے دیگر منصوبوں کو رہا ہے کہ اس پر کام کرنے والے افراد کی اولین ترجیحات کچھ اور ہوتی ہیں۔ اس کے علاوہ ٹیم تشکیل نہیں دی جاتی۔ یہی وجہ ہے کہ ایک، دو لوگ غائب ہونے میں دیر نہیں لگتی اور پیچھے پورا کام ٹھپ ہو جاتا ہے۔
منظرنامہ کے بند ہونے کا اردو بلاگنگ کمیونٹی کو بڑا نقصان پہنچا ہے۔