شو کمار بٹالوی بول وے مکھوں بول ۔ شو کمار بٹالوی

[فرخ منظور]

بول وے مکھوں بول

کوئی بول وے مکھوں بول
سجناں سانولیا
ساڈے ساہ وچ چیتر گھول
سجناں سانولیا

جے ساڈے ساہیں چیتر گھولیں
میں ہرنی بن جاواں
روپ تیرے دے سنگھنے باگیں
چگن سوگندھیاں آواں
توں مینوں ماریں باب برہوں دے
میں نتڑی غش کھاواں
لکھ پیاویں میں نہ پیواں
بول سوگندھیاں سوہل
سجناں سانولیا
ساڈے ساہ وچ چیتر گھول
سجناں سانولیا

جے ساڈے ساہیں چیتر گھولیں
میں چانن بن جاواں
ادھی راتیں ون چنن دے
تینڈی خاطر گاواں
مہک کواری پیروں بھاری
تینڈی سیج وچھاواں
ستے پے دا چمن لے کے
جاواں پرت اڈول
سجناں سانولیا
ساڈے ساہ وچ چیتر گھول
سجنا سانولیا

جے ساڈے ساہیں چیتر گھولیں
میں بدلی بن جاواں
جیہڑے راہیں ساہ تیرا لنگھے
اس راہ تے ورھ جاواں
ویدن دے کھوہ عمروں گہرے
گل گل بھردی جاواں
جیہڑے کھوہیں لج نہ ہوندی
نہ ہوندے سو ڈول
سجناں سانولیا
ساڈے ساہ وچ چیتر گھول
سجنا سانولیا
جے ساڈے ساہیں چیتر گھولیں
میں تتلی بن جاواں
بور برہوں دا عقلوں مہنگا
در در ونڈن جاواں
رکھ برہون دا نیہوں نکا
ارباں کوہ پرچھاواں
ایہ رکھ جیہا اولڑا اگدا
عین کلیجے کول
سجناں سانولیا
ساڈے ساہ وچ چیتر گھول
سجنا سانولیا
کوئی بول وے مکھوں بول
سجناں سانولیا

(شو کمار بٹالوی)

 

[تلمیذ]

فرخ جی،
سُچی تے سلکھنی بولی دا سواد شو ہوراں دے کلام وچہ ای لبھدا اے پر بعضے اکھر کم علمی کارن سروں لنگھ جاندے نہیں۔ اینہاں دی ‘مائے نی مائے‘ بوہت ای دل کھچویں اے تے اتوں نصرت فتح علی خاں ہوراں نے اینہوں امر کر دتا اے۔ دونویں جی ساہڈی بولی دے لشکدے تارے نیں۔

بر سبیل تذکرہ، اچیچ کوششاں دے باوجود مینوں حالی تیک اردو توں پنجابی لغت نئیں لبھ سکی تے تساں پشلے ورہے قرار وی کیتا سی پئی اینہوں ڈھونڈن وچ میری مدد کرو گے۔

کیہہ کجھ آس رکھاں؟

ادب نال

اصغر

 

[فرخ منظور]

اصغر صاحب اجے تیکر مینوں تے کوئی سراغ نہیں ملیا۔ شاید اردو توں پنجابی لغت کسے نے اج تائیں نہ لکھی اے نہ چھپی اے۔ کیونکہ ساری لغتاں پنجابی توں اردو یا پنجابی توں پنجابی ہے نے۔

 

[تلمیذ]

شکریہ، فرخ جی۔ فیر وی ذرا یاد رکھیو، جے کَدھروں اگھ سگھ لبھی تے دسیو۔

 

[mfdarvesh]

شکریہ بٹالوی صاحب کا مایے نی مائے میرے گیتاں، بہت ہی اچھا ہے اور پھر استاد کی آواز