مصطفیٰ زیدی بُجھ گئی شمعِ حَرم ، باب ِ کلیسا نہ کُھلا

[غزل قاضی]

بُجھ گئی شمعِ حَرم ، باب ِ کلیسا نہ کُھلا​

کُھل گئے زخم کے لب تیرا دریچہ نہ کُھلا​

​

در ِ توبہ سے بگوُلوں کی طرح گُزرے لوگ​

اُبر کی طرح اُمڈ آئے جو مَے خانہ کُھلا​

​

شہر در شہر پھری میرے گُناہوں کی بیاض​

بعض نظروں پہ مِرا سوز ِ حکِیمانہ کُھلا​

​

نازنِینوں میں رسائی کا یہ عالم تھا کبھی​

لاکھ پہروں میں بھی کاشانے پہ کاشانہ کُھلا​

​

اَب جو بےباک ہُوئے بھی تو بہ صد اندیشہ​

اَب جو اِک شخص کُھلا بھی تو حجابانہ کُھلا​

​

مِل کے بھی تُجھ سے رہی اب کے طبعیت اَیسے​

جیسے بادل سا گِھر آیا جو نہ برسا نہ کُھلا​

​

ہم پری زادوں میں کھیلے ، شب ِ افسوں میں پلے​

ہم سے بھی تیرے طلسمات کا عُقدہ نہ کُھلا​

​

ایک اک شکل کو دیکھا ہے بڑی حیرت سے​

اجنبی کون ہے اَور کون شناسا نہ کُھلا​

​

ریت پر پھینک گئی عقل کی گُستاخ لبی​

پھر کبھی کشف و کرامات کا دریا نہ کُھلا​

​

​

مصطفیٰ زیدی​

​

(قبائے ساز )​

 

[محمد وارث]

واہ کیا ہی اچھی غزل ہے۔

بہت شکریہ آپ کا ارسال فرمانے کیلیے

 

[سید زبیر]

واہ ۔۔۔بہت خوب
ایک اک شکل کو دیکھا ہے بڑی حیرت سے
اجنبی کون ہے اَور کون شناسا نہ کُھلا
سدا خوش رہیں

 

[نایاب]

بہت خوب شراکت

ہم پری زادوں میں کھیلے ، شب ِ افسوں میں پلے
ہم سے بھی تیرے طلسمات کا عُقدہ نہ کُھلا
ایک اک شکل کو دیکھا ہے بڑی حیرت سے
اجنبی کون ہے اَور کون شناسا نہ کُھلا

 

[غزل قاضی]

انتخاب پسند فرمانے کا شکریہ ، وارث صاحب ، سید زبیر صاحب ، نایاب بھائی ۔۔ سلامت رہیں !

 

[فارقلیط رحمانی]

بہت خوب! سلسلہ جاری رکھیے۔ اسی طرح کی غزلیں پوسٹ کرتے رہیے۔ ۔ ۔ ۔ ۔ ۔

 

[سید شہزاد ناصر]

بُجھ گئی شمعِ حَرم ، باب ِ کلیسا نہ کُھلا
کُھل گئے زخم کے لب تیرا دریچہ نہ کُھلا
در ِ توبہ سے بگوُلوں کی طرح گُزرے لوگ
اُبر کی طرح اُمڈ آئے جو مَے خانہ کُھلا

کیا ہی کہنے کیا زبردست غزل شریک محفل کی ہے ​

لطف آ گیا پڑھ کر میر پسندیدہ غزلوں میں سے ایک​

شادو آباد رہیں​

 

[nazar haffi]

ریت پر پھینک گئی عقل کی گُستاخ لبی
پھر کبھی کشف و کرامات کا دریا نہ کُھلا

 

[عمراعظم]

شہر در شہر پھری میرے گُناہوں کی بیاض
بعض نظروں پہ مِرا سوز ِ حکِیمانہ کُھلا
واہ ! بے حد خوبصورت ۔شیئر کرنے کے لئے شکریہ۔

 

[عمران اسلم]

​

ریت پر پھینک گئی عقل کی گُستاخ لبی​

پھر کبھی کشف و کرامات کا دریا نہ کُھلا​

واہ لاجواب غزل۔ بہت شکریہ شریک فرمانے کا۔​

 

[nazar haffi]

یہ تتلی فاحشہ ہے، پھول کے بستر پہ سوتی ہے
یہ جگنو شب کے پردے میں نہیں رہتا، یہ کافر ہے​

 

[نگار ف]

ایک اک شکل کو دیکھا ہے بڑی حیرت سے
اجنبی کون ہے اَور کون شناسا نہ کُھلا

بہت خوب