فانی :::: بِجلیاں ٹوُٹ پڑیں جب وہ مُقابل سے اُٹھا

[طارق شاہ]

غزلِ
فانی بدایونی

بِجلیاں ٹُوٹ پڑیں جب وہ مُقابِل سے اُٹھا
مِل کے پلٹی تھیں نِگاہیں کہ دُھواں دِل سے اُٹھا

جَلوہ محسُوس سہی، آنکھ کو آزاد تو کر
قید آدابِ تماشا بھی تو محفِل سے اُٹھا

پھر تو مضرابِ جنُوں، سازِ انا لیلےٰ چھیڑ
ہائے وہ شور انا القیس ، کہ محمِل سے اٹھا

اِختیار ایک ادا تھی مِری مجبُوری کی
لُطفِ سعیِ عَمل اِس مطلب حاصِل سے اٹھا

عُمرِ اُمید کے دو دِن بھی گراں تھے ظالم
مارِ فردا، نہ تِرے وعدۂ باطل سے اُٹھا

خبرِ قافلۂ گُم شُدہ کِس سے پُوچھوں
اِک بَگولہ بھی نہ خاکِ رہِ منزِل سے اُٹھا

ہوش جب تک ہے گلا گھونٹ کے مر جانے کا
دمِ شمشِیر کا احساں تِرے بِسمِل سے اُٹھا

موت ہستی پہ و ہ تُہمت تھی کہ آسان نہ تھی
زندگی مُجھ پہ وہ اِلزام کہ مُشکِل سے اُٹھا

کِس کی کشتی تہِ گرداب فنا جا پہنچی
شورِ لبیک، جو فانی لبِ ساحِل سے اُٹھا

فانی بدایونی​

 

[مدیحہ گیلانی]

موت ہستی پہ و ہ تُہمت تھی کہ آسان نہ تھی
زندگی مُجھ پہ وہ اِلزام کہ مُشکِل سے اُٹھا
واہ !
بہت ہی زبردست سی داد قبول کیجئے اتنے شاندار کلام پر ۔

 

[طارق شاہ]

موت ہستی پہ و ہ تُہمت تھی کہ آسان نہ تھی
زندگی مُجھ پہ وہ اِلزام کہ مُشکِل سے اُٹھا
واہ !
بہت ہی زبردست سی داد قبول کیجئے اتنے شاندار کلام پر ۔

تشکّر! گیلانی صاحبہ
اظہار خیال اور انتخاب کی پذیرائی پر
بہت خوش رہیں

 

[عاطف ملک]

موت ہستی پہ و ہ تُہمت تھی کہ آسان نہ تھی
زندگی مُجھ پہ وہ اِلزام کہ مُشکِل سے اُٹھا

کیا ہی خوبصورت کلام ہے۔۔۔واہ!
داد قبول کیجیے شاہ صاحب!

 

[کلیم گورمانی]

بہت ہی پیارا انتخاب طارق صاحب