فیض ترے غم کو جاں کی تلاش تھی ترے جاں نثار چلے گئے ۔ فیض

[فرخ منظور]

ترے غم کو جاں کی تلاش تھی ترے جاں نثار چلے گئے​

تری رہ میں کرتے تھے سر طلب ، سرِ رہگزار چلے گئے​

​

تری کج ادائی سے ہار کے شبِ انتظار چلی گئی​

مرے ضبطِ حال سے رُوٹھ کر مرے غم گسار چلے گئے​

​

نہ سوالِ وصل ، نہ عرضِ غم ، نہ حکایتیں نہ شکایتیں​

ترے عہد میں دلِ زار کے سبھی اختیار چلے گئے​

​

یہ ہمیں تھے جن کے لباس پر سرِ رہ سیاہی لکھی گئی​

یہی داغ تھے جو سجا کے ہم سرِ بزمِ یار چلے گئے​

​

نہ رہا جنونِ رُخِ وفا، یہ رسن یہ دار کرو گے کیا​

جنہیں جرمِ عشق پہ ناز تھا وہ گناہ گار چلے گئے​

​

​

(فیض احمد فیض)​

 

[نایاب]

نہ رہا جنونِ رُخِ وفا، یہ رسن یہ دار کرو گے کیا
جنہیں جرمِ عشق پہ ناز تھا وہ گناہ گار چلے گئے
واہہہہہہہہہہہہہہہہہ رے واہہہہہہہہہہہہہہہہہہ
فیض تیرا جواب نہیں ۔

 

[سید زبیر]

واہ ۔ کیا بات ہے
یہ ہمیں تھے جن کے لباس پر سرِ رہ سیاہی لکھی گئی
یہی داغ تھے جو سجا کے ہم سرِ بزمِ یار چلے گئے
بہت خوب

 

[لالہ رخ]

نہ سوالِ وصل ، نہ عرضِ غم ، نہ حکایتیں نہ شکایتیں
ترے عہد میں دلِ زار کے سبھی اختیار چلے گئے
واہ واہ!!