تعلیمی اداروں کے ترانے

[فہد اشرف]

ترانہ جامعہ سلفیہ بنارس

سحرکا پیرہن ہیں ہم بہار کی ردا ہیں ہم
بدن پہ زندگی کے رنگ و نور کی قبا ہیں ہم
چراغ کی طرح سرِ دریچۂ وفا ہیں ہم

مغنی حرم ہیں بربطِ لب حرا ہیں ہم
کہ گلشنِ رسول کے طیورِ خوشنوا ہیں ہم

کشود عقدۂ حیات معتبر ہمیں سے ہے
شعور جستجوئے ذات معتبر ہمیں سے ہے
تمام علم کائنات معتبر ہمیں سے ہے

خلاصہ اصل میں کتاب کائنات کا ہیں ہم
کہ گلشنِ رسول کے طیورِ خوشنوا ہیں ہم

سراغ جادۂ عمل حدیث مصطفی ہمَیں
اسی کا حرف حرف ہے نشاطِ ماجرا ہمَیں
نہیں قبول اب کوئی پیام دوسرا ہمَیں

اداشناس عظمتِ حدیث مصطفی ہیں ہم
کہ گلشنِ رسول کے طیورِخوشنوا ہیں ہم

یہ گاہوارہ ظاہری و باطنی علوم کا
مدینۃ السلف ہمارے مشرقی علوم کا
یہ ایک تربیت کدہ ہے مرکزی علوم کا

اسی فضائے دلکشامیں آج پَرکُشاں ہیں ہم
کہ گلشنِ رسول کےطیورِخوشنوا ہیں ہم

اسی کے خوشہ چیں ہیں ہم ہمارا جامعہ ہے یہ
بلاغت و معانی و بیاں کا گل کدہ ہے یہ
عرب کے طرزِ فکر سے عجم کا رابطہ ہے یہ

اسی کے لمس جاوداں سے روحِ ارتقاء ہیں ہم
کہ گلشنِ رسول کےطیورِ خوشنوا ہیں ہم

کھلیں گے رمز لوح کے کہ اب قلم ہے سامنے
تمام حاصلِ حیات بیش و کم ہے سامنے
ہراک طرف کہ جلوۂ رخِ حرم ہے سامنے

بنارس اب کہاں رخِ حرم کا آئینہ ہیں ہم
کہ گلشنِ رسول کےطیورِ خوشنوا ہیں ہم

نگاہ میں عہد رفتہ اب بھی حال کی طرح
سلف کا شیوہ سامنے ہے اک مثال کی طرح
صنم کدے میں ہم نے دی اذاں بلال کی طرح

نفس ہیں جبرئیل کا بلال کی نداہیں ہم
کہ گلشنِ رسول کےطیورِ خوشنوا ہیں ہم

یہ حرف برگزیدہ و شگفتہ کس زباں کا ہے
یہ نقش کس کی ندرت و لطافت بیاں کا ہے
یہی کلام حق وظیفہ قلب و جسم و جاں کا ہے

بتائیں کیا ازل سے ان کے ذوق آشنا ہیں ہم
کہ گلشنِ رسول کے طیورِ خوشنوا ہیں ہم

ورق ورق بصیرتوں کی روشنی سجائیں گے
حرارتِ یقیں سے پھردلوں کو جگمگائیں گے
نظر کو درسِ اسوۂ پیمبری سکھائیں گے

نقیبِ فضل و دانش و صداقت و صفا ہیں ہم
کہ گلشنِ رسول کےطیورِ خوشنوا ہیں ہم

خداکرے فضاؔ یوں ہی یہ خواب جاگتے رہیں
یہ خوشبوئیں جواں رہیں گلاب جاگتے رہیں
ہنرورانِ سنت وکتاب جاگتے رہیں

چمن چمن بشارتِ نسیم جاں فزاں ہیں ہم
کہ گلشنِ رسول کےطیورِ خوشنوا ہیں ہم

فضاابن فیضیؔ

 

[فہد اشرف]

 

[شکیب]

ترانہء ربانی
ایم ایم ربانی ہائی اسکول و جونئیر کالج کامٹی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اللہ اسے آباد رکھےیہ درس گہہِ ربانی ہے
سر سبز رکھے شاداب رکھے یہ درس گہہِ ربانی ہے

جو علم کی ضو پھیلاتی ہے وہ شمع یہاں پر جلتی ہے
اخلاق و محبت کی ہم کو تعلیم یہاں پر ملتی ہے

ہم اور ہمارے قلب و نظر اس علم کدے کے مظہر ہیں
تعلیم کی ضو سے منور ہیں اخلاص کی بو سے معطر ہیں

اس وقت تو ذرے ہیں لیکن ہم تارے بن کر چمکیں گے
بجلی کی طرح لہرائیں گے مانند گلوں کے مہکیں گے

ہر زخم سہیں گے ہنس ہنس کر، ہر طوفاں سے ٹکرائیں گے
پھر امن کا پرچم لے کر ہم اک روز جہاں پر چھائیں گے

سر سبز رکھے شاداب رکھے اللہ اسے آباد رکھے
آباد رکھے آباد رکھے آباد رکھے آباد رکھے

-کلام: ڈاکٹر زرینہ ثانی-​

 

[محمد مسلم]

ترانہ دار العلوم دیوبند

یہ علم و ہنر کا گہوارہ ، تاریخ کا وہ شہ پارہ ہے
ہر پھول یہاں اک شعلہ ہے، ہر سرو یہاں مینارہ ہے
*****************
خود ساقی کوثر نے رکھی، میخانے کی بنیاد یہاں
تاریخ مرتب کرتی ہے دیوانوں کی روداد یہاں
*****************
جو وادئ فاراں سے اٹھی ، گونجی ہے وہی تکبیر یہاں
ہستی کے صنم خانوں کے لئے ہوتا ہے حرم تعمیر یہاں
****************
برسا ہے یہاں وہ ابر کرم ، اٹھا تھا جو سوئے یثرب سے
اس وادی کا سارا دامن سیراب ہے جوئے یثرب سے
****************
کہسار یہاں دب جاتے ہیں، طوفان یہاں رک جاتے ہیں
اس کاخ فقیری کے آگے شاہوں کے محل جھک جاتے ہیں
****************
ہر بوند ہے جس کی امرت جل، یہ بادل ایسا بادل ہے
سو ساگر جس سے بھر جائیں یہ چھاگل ایسا چھاگل ہے
****************
مہتاب یہاں کے ذروں کو ہر رات منانے آتا ہے
خورشید یہاں کے غنچوں کو ہر صبح جگانے آتا ہے
****************
یہ صحن چمن ہے برکھارت، ہر موسم ہے برسات یہاں
گلبانگ سحر بن جاتی ہے، ساون کی اندھیری رات یہاں
****************
اسلام کے اس مرکز سے ہوئی تقدیسعیاں آزادی کی
اس بام حرم سے گونجی ہے سو بار اذاں آزادی کی
****************
اس وادئ گل کا ہر غنچہ، خورشید جہاں کہلایا ہے
جو رند یہاں سے اٹھا ہے وہ پیر مغاں کہلایا ہے
****************
جو شمع یقیں روشن ہے یہاں، وہ شمع حرم کا پر تو ہے
اس برم ولے اللھی میں، تنویر نبوت کی ضوہے
****************
یہ مجلس میں وہ مجلس ہے، خود فطرت جس کی قاسم ہے
اس بزم کا ساقی کیا کہیے جو صبح ازل سے قائم ہے
****************
جس وقت کسی "یعقوب " کی لے، اس گلشن میں بڑھ جاتی ہے
ذروں کی ضیا خورشید جہاں کو ایسے میں شرماتی ہے
****************
"عابد " کے یقین سے روشن ہے، سادات کا سچا صاف عمل
آنکھوں نے کہا دیکھا ہوگا، اخلاض کا ایسا تاج محل
****************
یہ ایک صنم خانہ ہے جہاں " محمود " بہت تیار ہوئے
اس خاک کے ذرے ذرے سے کس درجہ شرر بیدار ہوئے
****************
ہے عزم " حسین احمد " سے بپا ہنگامۂ گیرو دار یہاں
شاخوں کی لچک بن جاتی ہے باطل کے لئے تلوار یہاں
****************
رومی " کی غزل ، رازی " کی نظر ، غزالی "کی تلقین یہاں
روشن ہے جمال " انور " سے ، پیمانۂ فخرالدین یہاں
****************
ہر رند ہے "ابراہیم " یہاں ، ہر میکش ہے "اعجاز " یہاں
رندان ہدی پر کھلتے ہیں ، تقدیس طلب کے راز یہاں
****************
ہے کتنے " عزیز " اس محفل کے ، انفاس حیات افروز ہمیں
اس ساز معانی کے نغمے ، دیتے ہیں یقیں کا سوز ہمیں
****************
طیبہ کی مئے " مرغوب " یہاں ، دیتے ہیں سفال ہندی میں
روشن ہے چراغ "نعمانی " ، اس بزم کمال ہندی میں
****************
" خالق " نے یہاں اک تازہ حرم ، اس درجہ حسیں بنوایا ہے
دل صاف گواہی دیتا ہے ، یہ خلد بریں کا سایہ ہے
****************
اس بزم جنوں کے دیوانے ، ہر راہ سے پہنچے یزداں تک
ہیں عام ہمارے افسانے ، دیوار چمن سے زنداں تک
****************
سو بار سنوارا ہے ہم نے ، اس ملک کے گیسوئے برہم کو
یہ اہل جنوں بتلائیں گے ، کیا ہم نے دیا ہے عالم کو
****************
جو صبح ازل میں گونجی تھی ، فطرت کی وہی آواز ہیں ہم
پر وردۂ خوشبو غنچے ہیں ، گلشن کے لئے اعجاز ہیں ہم
****************
اس برق تجلی نے سمجھا ، پروانۂ شمع نور ہمیں
یہ وادئ ایمن دیتی ہے ، تعلیم کلیم طور ہمیں
****************
دریائے طلب ہوجاتا ہے ، ہر مے کش کا پایاب یہاں
ہم تشنہ لبوں نے سیکھے ہیں ، مے نوشی کے آداب یہاں
****************
بلبل کی دعا جب گلشن میں ، فطرت کی زباں ہوجاتی ہے
انوار حرم کی تابانی ہر سمت عیاں ہوجاتی ہے
****************
"امداد " و "رشید " و " اشرف " کا یہ قلزم عرفاں پھیلے گا
یہ " شجرۂ طیب " پھیلا ہے تا وسعت امکاں پھیلے گا
****************
خورشید یہ دین " احمد " کا ، عالم کے افق پر چمکے گا
یہ نور ہمیشہ چمکا ہے ، یہ نور برابر چمکے گا
****************
یوں سینۂ گیتی پر روشن ، اسلاف کا یہ کردار رہے
آنکھوں میں رہیں انوار حرم ، سینہ میں دل بیدار رہے
****************
کلام : حضرت مولانا ریاست علی ظفر بجنوری

 

[محمد مسلم]