قیصرانی نے کہا:
]شاکر القادری بھائی، یہاں آخری مصرعے میں استعمال ہونے والے لفظ “عیار“ کا کیا مفہوم ہوگا؟
قیصرانی بھائی!
اس قطعہ کا ترجمہ تو کر دیا تھا لیکن حل اللغات وغیرہ اب پیش کر رہا ہوں آپ کا مطلوبہ جواب اسی میں ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حل اللغات
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
1۔ سخن ھا =باتیں ﴿ "سخن" یعنی بات اور "ھا" فارسی میں کسی چیز کی جمع بنانے کے لیے استعمال ہوتا ہے﴾ گفتگو، ذکر۔
2۔ رفت: چلیں ﴿ مصدر ہے "رفتن" یعنی چلنا ۔ رفت ملضی مطلق ہے ۔ جس کے بنانے کا قاعدہ یہ ہے کہ مصدر کی "ن" کو ہٹا دیں تو ماضی مطلق بن جاتی ہے۔
3۔ از بود و نبودم:میری بود اور نبود کے بارے میں
از:سے ، کے بارے میں
بود : ہونا،
نبودم ﴿نہ + بود + م﴾ میرا نہ ہونا ﴿"م" فارسی میں واحد متکلم کی ضمیر متصل ہے﴾
4۔ از خجلت : ندامت کی وجہ سے
از: سے، کی وجہ سے
خجلت: خجالت، شرمندگی، ندامت
5۔ لب خود : اپنے لب، اپنی زبان
لب: ہونٹ، مراد ہے زبان
خود: اپنے
6۔ کشودم : کشود+م= کشودم ﴿ میں نے کھولے﴾
کشود: کھولے ﴿مصدر ہے "کشودن" مصدر کی "ن" کو ہٹا کر"کشود" بنایا گیا جو ماضی مطلق ہے جس کے معنی ہیں "کھولے" اور آخر میں"م" واحہد متکلم کی ضمیر متصل ہے جس سے ممعنی یوں ہوجاتے ہیں "میں نے کھولے"
7۔ سجود: سجدہ کی جمع سجدے
8۔ زندہ مرداں : زندہ مرد کی جمع ﴿ زندہ مراداں سے مراد ایسے لوگ ہیں جو اپنے اخلاص عمل اور اعلی کردار کی بدولت زندہ و جاوید ہوگئے﴾
9۔ می شناسی: تو جانتا ھے ﴿شناختن ﴿جاننا﴾ مصدر کا مضارع "شناسد"﴿جانے﴾ ھے مضارع کی "د" کو "ی" لگایا گیا ہے جوکہ واحد حاضر کی ضمیر متصل ہے اس طرح لفظ بن گیا "شناسی" تو جانے اور لفظ شناسی کے شروع میں "می" لگانے سے فعل حال جاری بن جاتا ہے اب لفظ " می شاسی" کے معنی ہونگے تو جانتا ہے
10۔ عیار کار من : میرے کام کا اندازہ ، میرے عمل کے اخلاص کی چانچ ،
عیار:چانچ، پرکھ، میزان، کسوٹی، پڑتال وغیرہ
کار: کام، فعل، کردار
من، میں، میرا ﴿ واحد متکلم کی ضمیر منفصل﴾ یعنی وہ ضمیر جو جڑی ہوئی نہ ہو
11۔ گیر: پکڑ، لے، لگا ﴿ گرفتن﴿ پکڑنا﴾ مصدر کے مضارع "گیرد" پکڑے کی "ی" کو ھٹا کر فعل امر بنایا گیا ہے۔
12۔ سجودم : سجود+م=سجودم: میرے سجدے
سجود:سجدہ کی جمع
م: واحدمتکلم کی ضمیر متصل یعنی میرے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ضمیر متصل اور ضمیر منفصل
گزشتہ دو تین اسباق میں ہم نے بار بار ضمیر منفصل اور ضمیر متصل کا نام لیا ہے یہاں مناسب ہوگا کہ ہم ان ضمیروں کو اچھی طرح ذہن نشین کر لیں تاکہ بار بار ان کا اعادہ نہ کرنا پڑے
ضمیر متصل:
وہ ضمیر ہوتی ہے جو کسی لفظ کے ساتھ جڑی ہوئی اور متصل ھو متصل ضمیروں کی علامات ذیل میں دی گئی ہیں
واحد غایب کے لئے کسی لفظ کے ساتھ "ش" کی ضمیر متصل لگائی جاتی ہے مثلا دلش دل+ش=دلش اس کا دل اسی طرح قلمش﴿ اس کا قلم﴾ وغیرہ
واحد حاضر کے لیے کسی بھی لفظ کے ساتھ "ت" کو جوڑ دیا جاتا ہے مثلا "دلت" تممہارا دل "قلمت" تمہارا قلم "حسنت" تمہارا حسن وغیرہ
واحد متکلم کے لیے کسی بھی لفظ کے ساتھ "م" کو جوڑ دیا جاتا ہے مثلا "دلم" میرا دل "سجودم" مییرے سجدے وغیرہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ضمیر منفصل
وہ ضمیر جو کسی لفظ کے ساتھ جڑی ہوئی نہ ہو بلکہ علیحدہ ہو
واحد غائب : قلم او ﴿ اس کا قلم﴾
جمع غایب : قلم آن ﴿ ان کا قلم﴾
واحد متکلم: قلم من ﴿ میرا قلم﴾
جمع متکلم: قلم ما ﴿ہمارا قلم﴾
واحد حاضر: قلم تو ﴿ تیرا قلم ﴾ وغیرہ
جمع حاضر: قلم شما ﴿ آپ کا قلم﴾ وغیرہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ماضی مطلق بنانے کا قاعدہ
فارسی میں مصدر کی نشانی یہ ہے کہ اس کے آخر میں "ن" آتا ہے
ماضی مطلق بنانے کا قاعدہ یہ ہے کہ کسی بھی مصدر کی "ن" کو ھٹا دیا جائے تو وہ صیغہ واحد غایب میں ماضی مطلق بن جاتا ہے
مثلا
رفتن ﴿جانا﴾ سے رفت: وہ گیا
آمدن ﴿آنا ﴾ سے آمد: وہ آیا
رفتن مضدر سے ماضی مطلق کی گردان
رفت: وہ گیا
رفتند: رفت + اند: وہ گئے
رفتی: رفت + ی: تو گیا
رفتید : رفت + اید: تم گئے
رفتم: رفت + م: میں گیا
رفتم: رفت + یم: ہم گئے
ضرورت اس بات کی ہے کہ فارسی سیکھنے کے شائقین مختلف مصادر سے ماضی مطلق کی اسی طرح گردان کر کے مشق بہم پہنچائیں
چند مصادر یہ ہیں
آمدن۔ ﴿آنا﴾، رفتن ﴿جانا﴾، شستن﴿دھونا﴾، گفتن ﴿کہنا﴾، خوردن ﴿کھانا﴾، کشادن ﴿کھولنا﴾، فہمیدن ﴿سمجھنا﴾، نوشیدن﴿پینا﴾، چشیدن ﴿چکھنا﴾
