تیری یادوں سے کچھ اس طور اُجالی میں نے --- شمشیر حیدر

[نوید صادق]

غزل

تیری یادوں سے کچھ اس طور اُجالی میں نے
ہجر کی شام بنا لی ہے وصالی میں نے

میں نے اس پھول کو کتنا ہی سنبھالے رکھا
یہ الگ بات کہ خوشبو نہ سنبھالی میں نے

تیری تصویر تو اب تجھ سے بھی کچھ آگے ہے
رنگ ہی ایسے بھرے آج مثالی میں نے

تجھ کو ہی دیکھا پھر امداد طلب نظروں سے
خود کو اندر سے جو سمجھا کبھی خالی میں نے

دور لوگوں میں کھڑ ا دیکھوں تماشا اپنا
اپنے ہاتھوں سے ہی جب آگ لگا لی میں نے

دل ملا ہے تری یادوں میں دھڑ کنے والا
آنکھ پائی ہے تجھے دیکھنے والی میں نے

روز خوابوں کے جزیروں میں نکل جاتا ہوں
تجھ سے ملنے کی نئی راہ نکالی میں نے


(شمشیر حیدر)

 

[عمران شناور]

واہ بہت اچھے!
نوید بھائی! آصف بھائی کا کویت سے سلام قبول کیجئے!

 

[محمد وارث]

لا جواب، بہت خوب

تیری تصویر تو اب تجھ سے بھی کچھ آگے ہے
رنگ ہی ایسے بھرے آج مثالی میں نے

دور لوگوں میں کھڑ ا دیکھوں تماشا اپنا
اپنے ہاتھوں سے ہی جب آگ لگا لی میں نے

شکریہ نوید صاحب خوبصورت غزل شیئر کرنے کیلیے!

 

[فرخ منظور]

خوبصورت غزل ہے۔ شکریہ نوید صاحب!

 

[شاہ حسین]

بہت خوب جناب

 

[ملائکہ]

مقطع بہت اچھا ہے غزل بھی