جاری تھی ابھی دُعا ہماری ۔۔۔۔۔۔۔ شاہین عباس

[نوید صادق]

غزل

جاری تھی ابھی دُعا ہماری
اور ٹوٹ گئی صدا ہماری

یاں راکھ سے بات چل رہی ہے
تُو شعلگی پر نہ جا ہماری

جھونکا تھا گریز کے نشے میں
دیوار گرا گیا ہماری

دُنیا میں سمٹ کے رہ گئے ہیں
بس ! ہو چکی انتہا ہماری

میں او ر الجھ گیا ہوں تجھ میں
زنجیر کُھلی ہے کیا ہماری!

آ ، دیکھ ، جو ہم دکھا رہے ہیں
آ ، بانٹ کبھی سزا ہماری

پانی پہ مذاق بن گئے ہم
کشتی میں نہ تھی جگہ ہماری

گو ایک غبار میں ہیں دونوں
وحشت ہے جدا جد ا ہماری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شاہین عباس
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

[شاہ حسین]

شکریہ جناب نوید صاحب شاملِ محفل کرنے کا ۔

 

[کاشفی]

خوب جناب۔۔۔۔

 

[محمد وارث]

بہت خوبصورت غزل ہے واہ واہ واہ، لاجواب۔

بہت شکریہ نوید صاحب پوسٹ کرنے کیلیے!