جاوید ہاشمی پاکستان تحریک انصاف میں شامل ہو گئے

[الف نظامی]

مخدوم جاوید ہاشمی نے پاکستان تحریک انصاف میں شمولیت کا اعلان کر دیا ہے جس پر ان کا کہنا ہے کہ تحریک انصاف میں شمولیت کیلیے کوئی ڈیل نہیں کی مخدوم جاوید ہاشمی آج ملتان سے کراچی کے لئے پی۔ آئی۔ اے کی فلائٹ پی۔ کے 331 پر روانہ ہوئے جہاں امید یہ ظاہر کی جا رہی ہے کہ کراچی ائیر پورٹ پر مخدوم جاوید ہاشمی کا استقبال پاکستان تحریک انصاف کے چئیرمین عمران خان کریں گے۔ جاوید ہاشمی جب ملتان میں اپنی رہائش گاہ سے ائیر پورٹ کے لئے روانہ ہوئے تو کارکنوں نے کافی دیر تک ان کا راستہ روکا اور گاڑی کے سامنے دھرنا دے دیا چند کارکنوں کا کہنا تھا کہ اگر آپ جیسے لیڈر پارٹی چھوڑ دیں گے تو ہم کس پر اعتماد کریں گے آپ پارٹی تبدیل نہ کریں جس پر مخدوم جاوید ہاشمی نے انہیں کہا کہ کارکنوں کے لئے ان کے گھر کے دروازے ہمشیہ کھلے ہیں میڈیا سے گفتگو کرتے ہوئے انہوں نے کہا کہ کھبی عہدوں کا مطالبہ نہیں کیا ہے اورکراچی روانہ ہو گئے۔

 

[الف نظامی]

پاکستان مسلم لیگ ن سے علیحدگی اور تحریک انصاف میں شمولیت کے اعلان کے بعد مخدوم جاوید ہاشمی کا کراچی پہنچنے پر شاندار استقبال کیا گیا۔ کراچی ائرپورٹ پر تحریک انصاف کے کارکنوں کی ایک بڑی تعداد موجود تھی جنہوں نے جاوید ہاشمی کو کندھوں پر اٹھا لیا اور ان پر گل پاشی کی۔ اس سے قبل جاوید ہاشمی نے لاوٴنج میں تحریک انصاف کے سربراہ عمران خان سے ملاقات کی جنہوں نے ان کا کراچی آمد پر پرتپاک خیر مقدم کیا۔ اس موقع پر دونوں رہنما انتہائی خوش نظر آئے، جبکہ کارکنوں نے زبردست نعرے بازی بھی کی۔

 

[الف نظامی]

اصولوں کی جنگ لڑیں گے، پاکستان بچائیں گے، جاوید ہاشمی
مخدوم جاوید ہاشمی نے تحریک انصاف میں باضابطہ شمولیت کا اعلان کر دیا۔ وہ کراچی آمد کے بعد تحریک انصاف کے سربراہ عمران خان اور شاہ محمود قریشی سمیت دیگر رہنماوٴں کے ہمراہ ایک پر ہجوم پریس کانفرنس سے خطاب کر رہے تھے۔ اس موقع پر عمران خان نے انہیں خوش آمدید کہتے ہوئے کہا کہ ہم فوجی آمر کے خلاف پارلیمنٹ میں اکھٹے اپوزیشن میں تھے، شاہ محمود قریشی کی آمد سے تحریک کے سونامی نے زور پکڑا، جاوید ہاشمی کی آمد سے تقویت ملی، ہم ایک نیا پاکستان بنانا چاہتے ہیں، نظام بدلنا چاہتے ہیں، جاوید ہاشمی نے ہم سے کچھ نہیں مانگا، صرف نظریئے کی بنیاد پر ہمارے ساتھ آئے ہیں، جاوید ہاشمی کے تجربے سے تحریک کو فائدہ ہوگا، جاوید ہاشمی اور شاہ محمود کے آنے سے ہمارا سفر آگے بڑھے گا۔ اس موقع پر جاوید ہاشمی نے کہا کہ عمران خان سیاست میں پندرہ سال سے پر عزم کوششیں کر رہے ہیں، کوئی مجھ سے پوچھتاتھا کہ کون سا کرکٹر پسند ہے تو میں کہتا عمران خان، اس ملک میں سیاست کا چیمپئن بھی عمران خان ہے، یہ مجھے جیل بھی ملنے آئے، ہمارا بات کرنے کا موٴقف بھی وقت گذرنے کے ساتھ ساتھ ایک جیسا ہوتا گیا۔ انہوں نے مزید کہا کہ میں نے اسمبلی میں1993سے سیاستدانوں کے اثاثے اور احتساب کی بات کی، یہ قوم کے چوکیداروں، سیاستدانوں کی ذمہ داری ہے کے آگے بڑھیں۔ جاوید ہاشمی نے کہا کہ عمران خان نے مجھ سے کہا کہ میں اپنے لئے نہیں پاکستان کے لئے آپ کے پاس آیا ہوں جس پر میں نے غور کرنے کا وعدہ کیا ۔ انہوں نے کہا کہ میں ایک سال سے حالات دیکھ رہا تھا اور چاہ رہا تھا کہ تبدیلی آئے، میری اپنی پارٹی سے کوئی ناراضی نہیں، میں لاڑکانہ میں میاں نواز شریف کے ساتھ تھا، ہم لاہور پہنچے تو انہوں نے مجھے پہلے خود گاڑی میں بٹھایا، میرا کوئی جھگڑا نہیں ہوا، میں صرف یہ جانتا ہوں کہ ملک کو جن بحرانوں کا سامنے ہے تحریک انصاف کی حل کی جانب رفتار سب سے بڑھی ہوئی ہے، عدلیہ بحالی تحریک میں پی ٹی آئی کے کارکن آگے آگے تھے، میں نے اپنے دوستوں سے مشورہ کیا، پارٹی ورکرز کو بھی بتایا، میرے ساتھی میرے پاوٴں پر گر گئے مجھے ان کا احساس ہے، لیکن میں سمجھتا ہوں کے ایک بڑے کام کے لئے فیصلہ کرنا تھا مجھے اس کے لئے بڑا فیصلہ کرنا پڑا، اس مقصد کو حاصل کرنے کیلئے تحریک انصاف میں شامل ہوا اور آج یہاں بیٹھا ہوں۔ انہوں نے واشگاف الفاظ میں کہا کہ ہم اصولوں کے لئے جنگ لڑیں گے، پاکستان کو نا اہلوں اور لٹیروں سے بچائیں گے، ہمارا کوئی مفاد نہیں، کوئی کاروبار بڑھانے کا مطالبہ نہیں۔ ایک سوال کے جواب میں انہوں نے کہا کہ میرا وزیر اعلیٰ پنجاب سے کوئی جھگڑا نہیں، وہ میرا بھائی بلکہ زیادہ بے تکلف دوست ہے، ہمیشہ پروٹوکول کے ساتھ میرا استقبال کیا۔ اس موقع پر عمران خان نے کہا کہ پاکستان کے اندر یہ ایک انقلاب آرہا ہے کہ حکومت میں شامل اقتدار پر براجمان لوگ اس پارٹی میں شامل ہو رہے ہیں جس کے پاس سیٹیں بھی نہیں، مفادات کی سیاست ختم ہو رہی ہے، یہ لوگ کسی بھی پارٹی میں جاسکتے تھے، یہ لوگ اقتدار کو چھوڑ کر نظریئے پر آرہے ہیں، کوئی ہماری پارٹی میں لڑائی کی وجہ سے نہیں بلکہ نظریے کی وجہ سے شامل ہوا۔ خفیہ ہاتھ سے متعلق ایک سوال کے جواب میں عمران خان نے کہا کہ لاہور کے جلسے میں ڈھائی لاکھ لوگ تھے، کل ہونے والے جلسے میں عوام آرگنائزیشن دیکھ لیں گے، خفیہ ہاتھ صرف اللہ کا ہے۔

 

[الف نظامی]

کراچی : عمران خان اور جاوید ہاشمی کی پریس کانفرنس

 

[شمشاد]

اب ن لیگ جاوید ہاشمی میں ہزاروں کیڑے نکالے گی۔

 

[محمداحمد]

جاوید ہاشمی جیسے صاف ستھرے اور بے باک لیڈر کا تحریکِ انصاف میں شامل ہونا تحریکِ انصاف کے لئے بہت حوصلہ افزا بات ہے۔

 

[محب علوی]

یہ بہت بڑی خبر ہے اور ن لیگ کی بنیادیں ہل گئی ہیں اس واقعہ کے بعد۔

 

[حماد]

یہ بہت بڑی خبر ہے اور ن لیگ کی بنیادیں ہل گئی ہیں اس واقعہ کے بعد۔

بھیا آپ جاوید ہاشمی کی تحریک انصاف میں شمولیت پر خوش ہیں یا ن لیگ کی بنیادیں ہل جانے پر؟

 

[محب علوی]

بھیا آپ جاوید ہاشمی کی تحریک انصاف میں شمولیت پر خوش ہیں یا ن لیگ کی بنیادیں ہل جانے پر؟

دونوں پر۔

 

[محمد امین]

چلیے صاحب جو ہوتا ہے اچھے کے لیے ہوتا ہے ۔۔۔۔ وہ گانا ہے نا۔۔۔

 

[الف نظامی]

مسلم لیگ ن کا ردعمل:
جاوید ہاشمی نے سوچ سمجھ کر فیصلہ کیا ، خدا حافظ کہہ کر جاتے تواچھا ہوتا،نوازشریف
مسلم لیگ ن کے صدر نواز شریف کا کہنا ہے کہ جاوید ہاشمی نے جو فیصلہ کیا وہ سوچ سمجھ کر کیا ہو گا، اچھا ہوتا اگر وہ انہیں خدا حافظ کہہ کر جاتے۔لاہور میں میڈیا سے گفتگو کرتے ہوئے میاں نواز شریف کا کہنا تھا کہ جاوید ہاشمی کے ساتھ اچھا وقت گزرا، ایک دوسرے کا ساتھ دیا، انہوں نے ہمیشہ جاوید ہاشمی کا احترام کیا۔ وہ جہاں بھی گئے ان کے لئے دعا گو رہیں گے۔ نواز شریف نے بتایا کہ وہ جلا وطن تھے تو جاوید ہاشمی جیل میں تھے تاہم ان کے ساتھ تعلق قائم رہا۔ مسلم لیگ ن نظریاتی جماعت ہے، اسٹیبلشمنٹ کے خلاف ایک اسٹینڈ لیا اور اس کو برقرار رکھیں گے، اسی اسٹینڈ کے ذریعے پاکستان کو تبدیل کریں گے۔ میاں نواز شریف کا کہنا تھا کہ یہی ٹیم پاکستان کو تبدیلی کے ایک نئے دور میں لے جائے گی۔

جاوید ہاشمی کے جانے کا بہت افسوس ہوا ہے : احسن اقبال
لاہور…مسلم لیگ ن کے مرکزی رہنما احسن اقبال کا کہنا ہے کہ جاوید ہاشمی کے جانے کا بہت افسوس ہوا ہے اندازہ نہیں انہوں نے کیا سوچ کر تحریک انصاف میں شمولیت کا فیصلہ کیا۔ پنجاب کے وزرا چودہری عبدالغفور اور احمد علی اولکھ کا کہنا ہے کہ جاوید ہاشمی کے جانے کا دکھ ہوا ،اُنہوں نے پارٹی کیلئے قربانیاں دیں۔

جاوید ہاشمی کے فیصلے سے دل ٹوٹ گیا، پرویز رشید
پاکستان مسلم لیگ ن کے ترجمان پرویز رشید نے کہا ہے کہ آج ملتان میں گیارہ بجے مخدوم جاوید ہاشمی سے ملاقات طے تھی تاہم ناجانے وہ کونسی طاقتیں ہیں جنہوں نے یہ ملاقات نہیں ہونے دی۔ پرویز رشید نے جیو نیوز سے ٹیلی فون پر گفتگو کرتے ہوئے کہا کہ مخدوم جاوید ہاشمی کے ساتھ ہمارا طویل تعلق رہا ہے اورہم نے جمہوریت کے لیے اکھٹے لاٹھیاں کھائیں ہیں، ان کے اس فیصلے سے دل ٹوٹ گیا۔انھوں نے کہا کہ آج ملتان میں گیارہ بجے مخدوم جاوید ہاشمی سے ملاقات طے تھی لیکن ناجانے وہ کونسی طاقتیں ہیں جنہوں نے یہ ملاقات نہیں ہونے دی۔پرویز رشید نے کہا کہ یہ وہ طاقتیں جو پارٹیوں کو توڑتی رہیں ہیں کبھی یہ طاقتیں ضمیر کی آواز بن کر اور کبھی احسان بن کر دوسروں پر اتر رہی ہیں۔

 

[الف نظامی]

مخدوم جاوید ہاشمی کو تحریک انصاف کا چیف آرگنائزر بنائے جانے کا امکان ہے ۔ عمران خان کے ساتھ موجود مخدوم جاوید ہاشمی سے جب اُن کے چیف آرگنائز ر بنائے جانے کے امکان کا سوال کیاگیا تو اُنہوں نے مسکرانے پر ہی اکتفا کیا اور کسی قسم کی تردید یا تصدیق نہیں کی ۔اگر جاوید ہاشمی کو تحریک انصاف کا چیف آرگنائز ر بنایاجاتاہے تو وہ اپنے عہدے کے لحاظ سے تحریک انصاف میں بھی شاہ محمود قریشی سے بڑے لیڈر بن جائیں گے ۔ذرائع کاکہناہے کہ پرانے سیاستدانوں کے ساتھ ساتھ ہاشمی بہت سارے جوانوں کو بھی تحریک انصاف میں لانے کے خواہاں ہیں جبکہ مسلم لیگ ن کے رہنماﺅں کی بیرون ملک موجودگی میں بھی جاوید ہاشمی نے اپنی جماعت کو سنبھالا اور اب تحریک انصاف اُن کی خدمات اور تجربے کو استعمال کرکے فائدہ اُٹھانا چاہتی ہے ۔متعدد ڈاکٹر اور انجینئروں کی بھی تحریک انصاف میں شمولیت کی اطلاعات ہیں ۔واضح رہے کہ آج علی الصبح 14سالہ مسلم لیگ ن سے اپنی رفاقت ختم کرتے ہوئے مخدوم جاوید ہاشمی نے پاکستان تحریک انصاف میں شمولیت کا اعلان کردیا اور کراچی پہنچنے پر خود عمران خان نے ہاشمی کا استقبال کیا۔

 

[کاشفی]

جاوید ھاشمی کو تحریک انصاف میں شمولیت اختیار کرنے پر دل کی گہرائیوں سے مبارکباد۔ اُمید ہے کہ اور بھی مزید لوٹے تحریکِ انصاف میں شامل ہونگے۔

 

[شمشاد]

بدلتا ہے رنگ آسماں کیسے کیسے؟

 

[کاشفی]

اَیّو راما ۔ وہاٹ از دز ڈراما ! ۔ نون لیگ کی ناؤ تو اب ڈُگَر ڈُگر کر رہی ہے۔ جیا اُ ن کا کرے دھک دھک۔
عزت مآب پرویز مشرف سید کے جونیئرز نے بہت خوب پلانگ کی ہے۔۔۔ویل ڈن۔ بہت سی داد قبول کریں۔ پرویز مشرف سید کی وطن وآپسی کے لیئے راہیں ہموار ہورہی ہیں۔۔

 

[پپو]

اچھی بات ہے صاف ستھری قیادت ایک پلیٹ فارم پر اکٹھی ہوجائے تاکہ ملک کا بھی چھا دور شروع ہو سکے اللہ کرے

 

[زین]

مجھے ہاشمی کے اس فیصلے پر دکھ ہوا۔

 

[فرحان دانش]

مجھے لگ رہا ہے کہ تحریک انصاف دوسری "ق لیگ" بننے والی ہے۔

 

[عثمان]

آئی ایس آئی نے تحریک انصاف میں شمولیت کا اعلان کردیا

 

[عثمان]

مجھے لگ رہا ہے کہ تحریک انصاف دوسری "ق لیگ" بننے والی ہے۔