اسلام آباد (محمد صالح ظافر/خصوصی تجزیہ نگار) جیو انگلش کو شروع کرنے کے لئے اس کی انتظامیہ نے تقریباً ایک سال قبل درخواست دائر کی تھی اور اس سلسلے میں ضابطے کی تمام کارروائیاں مکمل ہوچکی ہیں لیکن اس کے لائسنس کا اجرا نہیں کیا گیا۔ ذرائع نے ”جنگ“ کے خصوصی سینٹرل رپورٹنگ سیل کو بتایا ہے کہ جیو انگلش کو لائسنس جاری نہ کرنے کا فیصلہ کیا گیا ہے اور اس مقصد کے لئے قوانین اور پیمرا کے ضوابط میں ایسی تبدیلیاں متعارف کرائی جارہی ہیں جن کے ذریعے لائسنس کے اجرا کو فنی طورپر ناممکن بنادیا جائے گا۔یہ امر قابل تذکرہ ہے کہ جیو کی انتظامیہ نے اپنے انگلش چینل کے لئے ملک کے سرکردہ صحافیوں کی خدمات حاصل کر رکھی ہیں جنہیں بھاری مشاہرے دیئے جارہے ہیں اور اس انگلش چینل کی دیکھ بھال پر ادارہ دو ارب روپے کے لگ بھگ اخراجات اس کے اجرا کے بغیر برداشت کر چکا ہے ۔ جیو انگلش کے عدم اجرا اور تاخیر کی صحافتی حلقوں میں تشویش اور بے چینی پائی جاتی ہے، واضح رہے کہ جیو انگلش پاکستان کے بین الاقوامی تاثر اور اس کے نقطہ نگاہ کو عالمی رائے عامہ کے سامنے زیادہ موثر طورپر پیش کرنے کے لئے ازحدکارآمد ثابت ہوگا۔
حیرت ھے