میر خرابی کچھ نہ پوچھو ملکتِ دل کی عمارت کی ۔ میر تقی میر

[فرخ منظور]

خرابی کچھ نہ پوچھو ملکتِ دل کی عمارت کی
غموں نے آج کل سنیو وہ آبادی ہی غارت کی

نگاہِ مست سے جب چشم نے اس کی اشارت کی
حلاوت مے کی اور بنیاد میخانے کی غارت کی

سحرگہ میں نے پوچھا گل سے حالِ زار بلبل کا
پڑے تھے باغ میں یک مشت پر اودھر اشارت کی

جلایا جس تجلی جلوہ گر نے طور کو ہم دم
اسی آتش کے پر کالے نے ہم سے بھی شرارت کی

نزاکت کیا کہوں خورشید رو کی کل شبِ مہ میں
گیا تھا سائے سائے باغ تک تس پر حرارت کی

نظر سے جس کی یوسف سا گیا پھر اس کو کیا سوجھے
حقیقت کچھ نہ پوچھو پیرِ کنعاں کی بصارت کی

ترے کوچے کے شوقِ طوف میں جیسے بگولا تھا
بیاباں میں غبارِ میرؔ کی ہم نے زیارت کی

(میر تقی میر)
​

 

[ظہیراحمدظہیر]

فرخ بھائی ، مطلع کا پہلا مصرع ایک دفعہ پھر سے دیکھ لیجئے گا۔ مجھے لگتا ہے کہ یہاں مملکت نہیں ملکت ہونا چاہئے ۔

 

[فرخ منظور]

فرخ بھائی ، مطلع کا پہلا مصرع ایک دفعہ پھر سے دیکھ لیجئے گا۔ مجھے لگتا ہے کہ یہاں مملکت نہیں ملکت ہونا چاہئے ۔

نشاندہی کا بہت شکریہ یہاں ملکت ہی ہے۔ میں درست کر دیتا ہوں۔