فلک شیر
محفلین
خلش
خرابہ----------مِرے دل کی دنیا
نہ روشن کوئی امیدِ طاقِ فردا
نہ وا کوئی دروازہءِ دل کُشا
کہ جس سے پرے
چہکتی ہوئی پائلوں کے ترنم کی سنگت میں بولے
مہکتا دھواں
خرابہ----------
مِرے دل کی دنیا
جہاں حسرتیں بھوت بن کر ڈراتی ہیں
ہر تازہ وارد کو---------
ہر آرزو کو
کہ جیسے کوئی پیرِ فرتوت
تاریک شب میں
کسی مقبرے میں ہو نوحہ کناں
خرابہ--------
مرے دل کی بستی
جہاں نادمیدہ گُلوں کا تبسم
خرامِ صبا کی دل آویز لغزش سے نا آشنا
کفن گردِ حسرت کا اوڑھے
ہر ایک ذرہءِِ تشنہ سے پوچھتا ہے
کہاں ہے میری صبحِ شبنم فشاں؟!
(احمد شمیم)
