عباس تابش دہکتے دن میں عجب لطف اٹھایا کرتا تھا (عباس تابش)

[عاطف بٹ]

دہکتے دن میں عجب لطف اٹھایا کرتا تھا​

میں اپنے ہاتھ کا تتلی پہ سایہ کرتا تھا​

​

اگر میں پوچھتا بادل کدھر کو جاتے ہیں​

جواب میں کوئی آنسو بہایا کرتا تھا​

​

یہ چاند ضعف ہے جس کی زباں نہیں کھلتی​

کبھی یہ چاند کہانی سنایا کرتا تھا​

​

میں اپنی ٹوٹتی آواز گانٹھنے کے لئے​

کہیں سے لفظ کا پیوند لایا کرتا تھا​

​

عجیب حسرتِ پرواز مجھ میں ہوتی تھی​

میں کاپیوں میں پرندے بنایا کرتا تھا​

​

تلاشِ رزق میں بھٹکے ہوئے پرندوں کو​

میں جیب خرچ سے دانہ کھلایا کرتا تھا​

​

ہمارے گھر کے قریب ایک جھیل ہوتی تھی​

اور اس میں شام کو سورج نہایا کرتا تھا​

​

یہ زندگی تو مجھے تیرے پاس لے آئی​

یہ راستہ تو کہیں اور جایا کرتا تھا​

 

[مدیحہ گیلانی]

یہ زندگی تو مجھے تیرے پاس لے آئی​

یہ راستہ تو کہیں اور جایا کرتا تھا،​

واہ واہ کیا ہی خوب شعر ہے ۔​

 

[عاطف بٹ]

یہ زندگی تو مجھے تیرے پاس لے آئی​

یہ راستہ تو کہیں اور جایا کرتا تھا،​

واہ واہ کیا ہی خوب مقطع ہے ۔​

بہت شکریہ۔
معذرت مگر یہ مقطع نہیں، آخری شعر ہے۔

 

[مدیحہ گیلانی]

بہت شکریہ۔
معذرت مگر یہ مقطع نہیں، آخری شعر ہے۔

جی بجا کہا جلدی میں لکھا گیا ۔۔بعد میں احساس ہوا کہ نام تو موجود ہی نہیں مگر اب پچھتائے ۔۔۔سو !خیر تدوین کر دی ہے شکریہ توجہ دلاؤ نوٹس کا

 

[صائمہ شاہ]

واہ
میں اپنے ہاتھ کا تتلی پہ سایہ کرتا تھا