رویا زار و زار نہیں جاندا

[زیرک]

رویا زار و زار نہیں جاندا
مریا وی تے یار نہیں جاندا
بُھکھ جد حملہ آور ہووے
اِک وی خالی وار نہیں جاندا
اندرو اندریں سُک جاندا اے
اتھرو اکھیوں باہر نہیں جاندا
ساڈے حال توں بے خبرا ایں
تیرے گھر اخبار نہیں جاندا؟
ست اسمانوں پار پتہ نہیں
کیوں ہاواں دا ڈار نہیں جاندا
نِکی عمرے غربت والا
ساڈے سر توں بھار نہیں جاندا
حسرت دل وِچ پخدی رہندی
اِک پَل وی بے کار نہیں جاندا

احمد نعیم ارشد​

 

[عبدالقیوم چوہدری]

بوہت ای ودھیا جی۔