مہ جبین
محفلین
رُخِ ابرِ کرم عنواں ہے میرے بابِ ہجراں کا
"مرا ہر داغِ دل اک تخم ہے سروِ چراغاں کا"
قدم چومے ہیں جن ذروں نے خورشیدِ رسالت کے
بیاں کیا کیجیے ان ذرہ ہائے مہر ساماں کا
مرے سرکار کی کملی سے ایسی روشنی پھوٹی
کہ ذروں کو بھی منصب مل گیا مہرِ درخشاں کا
غریبِ دشتِ ہجراں صاحبِ شہرِ طرب ٹھہرا
مدینے میں کُھلا جوہر مرے شوقِ فراواں کا
بہارِ گنبدِ خضریٰ ، منارِ مسجدِ آقا
مری آنکھوں میں ہر منظر ہے اُس شہرِ درخشاں کا
صدا صلِّ علےٰ کی دَم بہ دَم کانوں میں آتی ہے
غمِ سرکار زخمہ ہے مرے سازِ رگِ جاں کا
خدارا مجھ خزاں دیدہ کو اُس گلشن میں بلوالو
جہاں ہر وقت رہتا ہے سماں جشنِ بہاراں کا
خدا کی حمد ، مدحِ صاحبِ لوح و قلم کیجیے
کہ اک اُمّی معلم ہے دوعالم کے دبستاں کا
ایاز ان کا سراپا ہر نفس نظروں میں رہتا ہے
خیالِ سرورِ دیں آئینہ ہے میرے ایماں کا
ایاز صدیقی
