ناصر کاظمی رہ نوردِ بیابانِ غم صبر کر صبر کر

[سید شہزاد ناصر]

رہ نوردِ بیابانِ غم صبر کر صبر کر​

کارواں پھر مِلیں گے بہم صبر کر صبر کر​

​

بے نِشاں ہے سفر رات ساری پڑی ہے مگر​

آرہی ہے صدا دم بدم صبر کر صبر کر​

​

تیری فریاد گو نجے گی دھرتی سے آکاش تک​

کوئی دِن اور سہہ لے سِتم صبر کر صبر کر​

​

ترے قدموں سے جاگیں گے اُجڑے دِلوں کے ختن​

پاشکستہ غزالِ حرم صبر کر صبر کر​

​

شہر اُجڑے تو کیا ، ہے کشادہ زمین خُدا​

اِک نیا گھر بنائیں گے ہم صبر کر صبر کر​

​

یہ محلاّتِ شاہی تباہی کے ہیں منتظر !​

گِرنے والے ہیں اِن کے علم صبر کر صبر کر​

​

دف بجائیں گے برگ و شجر صف بہ صف ہر طرف​

خشک مٹّی سے پھوٹے گا نم صبر کر صبر کر​

​

لہلہائیں گی پھر کھیتیاں کارواں کارواں​

کُھل کے برسے گا ابرِکرم صبر کر صبر کر​

​

کیوں پٹکتا ہے سر سنگ سے جی جلا ڈھنگ سے​

دِل ہی بن جائے گا خود صنم صبر کر صبر کر​

​

پہلے کِھل جائے دِل کا کنول پھر لِکھیں گے غزل​

کوئی دم اے صریرِ قلم صبر کر صبر کر​

​

درد کے تار مِلنے تو دے ہونٹ ہلنے تو دے​

ساری باتیں کریں گے رقم صبر کر صبر کر​

​

دیکھ ناصِر زمانے میں کوئی کِسی کا نہیں​

بھُول جا اُس کے قول و قسم صبر کر صبر کر​

 

[غدیر زھرا]

یہ محلاّتِ شاہی تباہی کے ہیں منتظر !
گِرنے والے ہیں اِن کے علم صبر کر صبر کر

دف بجائیں گے برگ و شجر صف بہ صف ہر طرف
خشک مٹّی سے پھوٹے گا نم صبر کر صبر کر

کیا کہنے بہت عمدہ

 

[طارق شاہ]

شہر اُجڑے تو کیا ، ہے کشادہ زمینِ خُدا
اِک نیا گھر بنائیں گے ہم صبر کر صبر کر

بہت لاجواب انتخاب ​

تشکّر شیئر کرنے پر صاحب! ​

بہت خوش رہیں​

 

[فہیم ملک جوگی]

واااہ واااہ کمال است ۔ ۔ پسندیدہ غزل ۔