زراعتی شاعری

[جاسمن]

جو میرے گاؤں کے کھیتوں میں بھوک اگنے لگی
مرے کسانوں نے شہروں میں نوکری کر لی

عارف شفیق

 

[شمشاد]

حلال رزق کا مطلب کسان سے پوچھو
پسینہ بن کے بدن سے لہو نکلتا ہے
عادل رشید

 

[محمداحمد]

اب میں راشن کی قطاروں میں نظر آتا ہوں
اپنے کھیتوں سے بچھڑنے کی سزا پاتا ہوں

خلیل

 

[محمد تابش صدیقی]

جس کھیت سے دہقاں کو میسر نہیں روزی
اس کھیت کے ہر خوشۂ گندم کو جلا دو
اقبالؒ

 

[ام اویس]

اک اور کھیت پکی سڑک نے نگل لیا
اک اور گاؤں شہر کی وسعت میں کھو گیا

خالد صدیقی

 

[ام اویس]

یہ تنگ و تار جھونپڑیاں گھاس پھوس کی

اب تک جنھیں ہوا نہ تمدن کی چھو سکی

ان جھونپڑوں سے دور اور اس پار کھیت کے

یہ جھاڑیوں کے جھنڈ یہ انبار ریت کے

یہ سادگی کے رنگ میں ڈوبا ہوا جہاں

ہنگامۂ جہاں ہے سکوں آشنا جہاں

یہ دوپہر کو کیکروں کی چھاؤں کے تلے

گرمی سے ہانپتی ہوئی بھینسوں کے سلسلے

ریوڑ یہ بھیڑ بکریوں کے اونگھتے ہوئے

جھک کر ہر ایک چیز کی بو سونگھتے ہوئے

یہ آندھیوں کے خوف سے سہمی ہوئی فضا

جنگل کی جھاڑیوں سے سنکتی ہوئی ہوا

یہ شام کے مناظرِ رنگیں کی خامشی

اور اس میں گونجتی ہوئی جھینگر کی راگنی

بچے غبارِ راہگزر پھانکتے ہوئے

میدان میں مویشیوں کو ہانکتے ہوئے

برفاب کے دفینے اگلتا ہوا کنواں

یہ گھنگھروؤں کی تال پہ چلتا ہوا کنواں

یہ کھیت، یہ درخت، یہ شاداب گرد و پیش

سیلابِ رنگ و بو سے یہ سیراب گرد و پیش

مستِ شباب کھیتیوں کی گلفشانیاں

دوشیزۂ بہار کی اٹھتی جوانیاں

یہ نزہتِ مظاہرِ قدرت کی جلوہ گہ

ہاں ہاں یہ حسنِ شاہدِ فطرت کی جلوہ گہ

دنیا میں جس کو کہتے ہیں گاؤں یہی تو ہے

طوبیٰ کی شاخِ سبز کی چھاؤں یہی تو ہے

مجید امجد

 

[شمشاد]

لاکھ خشکی کھیت میں کھلیان میں موجود ہے
آس بارش کی دل دہقان میں موجود ہے
شاداب انجم

 

[مومن فرحین]

نہیں نو امید میں اقبال اپنی کشت ویراں سے
ذرا نم ہو تو یہ مٹی بہت زر خیز ہے ساقی

حضرت اقبال رح

 

[جاسمن]

گییت ہریالی کے گائیں گے سسکتے ہوئے کھیت
محنت اب غارت جاگیر تک آ پہنچی ہے
پرویز شاہدی

 

[جاسمن]

گندم کی بالیاں ہی وہ بیٹی کو دے سکے
مالک میرے کسان کے کھیتوں کی خیر ہو

 

[گُلِ یاسمیں]

جا چکے سارے بگولے فکر کی کیا بات ہے
کھیت کو سیراب کرنے اب گھٹا بھی آئے گی
افضل منہاس

 

[محمد عبدالرؤوف]

موسم اچھا ، پانی وافر ، مٹی بھی زرخیز
جس نے اپنا کھیت نہ سینچا ، وہ کیسا دہقان

علامہ محمد اقبال

 

[گُلِ یاسمیں]

اگے گی فصل محبت کی کس طرح رحمان
دلوں کا کھیت ہی بنجر دکھائی دیتا ہے
عطا الرحمن عطا

 

[شمشاد]

میرے دل میں اگتی پیار کی فصل کو
جب لوگوں کی نفرت کے فضلے کی کھاد ملی
تو سٹے چمک کر سونا ہو گئے
پھر وہی فصل کاٹنے کا وقت آیا تو میرے خلوص کی درانتی کند ہو گئی
اور دل شکم کے آنسوؤں سے بھر آیا

درانتی خوب چلائی گئی لیکن فصل نہ کٹی
میرے ہاتھوں پر کیچڑ لگا ہوا تھا
سٹے نیلے ہو چکے تھے

محبت نے خلوص کے ساتھ نیت کو اٹھا کر نفرت کے فضلے پہ پٹخ ڈالا
اور درد نے محبت کے اپلے ناف پر تھاپنا شروع کر دیے
(تبسم ضیا)

 

[گُلِ یاسمیں]

خون اس کا کھیت میں بہتا ہے جیسے پانی
بنتی ہے جس کے پسینے سے سبھی کی روٹی
ادتیہ شری واستو شفق

 

[شمشاد]

گلاب سوکھ گئے ہیں ہوئے ہیں خار ہرے
ہوس نے پیار میں ڈالی ہے کھاد نفرت کی
محمد مبشر میو

 

[گُلِ یاسمیں]

یہ کھیت جیسے کہ میر و غالب کے شعر ساحر
یہ کچے رستے ہمارے گاؤں کی شاعری ہیں

 

[شمشاد]

اک فصل گل کو لے کے تہی دست کیا کریں
آئی ہے فصل گل تو گریباں بھی چاہئے
حبیب احمد صدیقی

 

[گُلِ یاسمیں]

فصلِ گُل کیا کر گئی آشفتہ سامانوں کے ساتھ
ہاتھ ہیں الجھے ہوئے اب تک گریبانوں کے ساتھ
سُرُور بارہ بنکوی

 

[جاسمن]

بھوک سے رشتہ ٹوٹ گیا تو ہم بے حس ہو جائیں گے
اب کے جب بھی قحط پڑے تو فصلیں پیدا مت کرنا

شہریار