طارق شاہ
محفلین
فراق گورکھپوری
غزل
زیر و بم سے سازِ خلقت کے جہاں بنتا گیا
یہ زمیں بنتی گئی ، یہ آسماں بنتا گیا
داستانِ جورِ بیحد خُون سے لکھتا رہا
قطرہ قطرہ اشکِ غم کا، بیکراں بنتا گیا
عشقِ تنہا سے ہُوئیں ، آباد کتنی منزلیں
اِک مُسافر کارواں در کارواں بنتا گیا
ہم کو ہے معلوُم سب رودادِ علم و فلسفہ
ہاں، ہرایمان و یقیں وہم و گماں بنتا گیا
میں کتابِ دل میں اپنا حالِ غم لِکھتا رہا
ہر ورق اِک بابِ تاریخِ جہاں بنتا گیا
میری گھُٹی میں پڑی تھی ہو کے حَل، اُردو زباں
جو بھی میں کہتا گیا ، حُسنِ بیاں بَنتا گیا
سرزمینِ ہند پر اقوامِ عالم کے، فراق !
قافلے بَستے گئے، ہندوستاں بنتا گیا
رگھوپتی سہائے، فراق گورکھپوری
