سلامی پی لیا جامِ شہادت شادماں ہو کر - منشی للتا پرشاد 'شاد' میرٹھی

[حسان خان]

سلامی پی لیا جامِ شہادت شادماں ہو کر​

حسین ابنِ علی نے جان دی، جانِ جہاں ہو کر​

​

زمینِ کربلا نے غم دیا ہے آسماں ہو کر​

لبِ دریا جہاں پیاسے رہے سب نیم جاں ہو کر​

​

الٰہی! برق وش آہیں نکلتیں برچھیاں ہو کر​

فلک سے ٹوٹ پڑتیں، شمر پر پھر بجلیاں ہو کر​

​

بھلا حسنین، بِن× شیرِ خدا، دنیا میں کیوں رہتے​

خدا کے پاس جا پہونچے، خدا کے رازداں ہو کر​

​

یہ آخر کیا کرشمہ تھا کہ گُل ہائے رسول اللہ​

خزاں میں جا پھنسے، گلچیں کے ہاتھوں، باغباں ہو کر​

​

اُنہیں مرنا تو تھا اک دن، مگر غم ہے تو اتنا ہے​

اجل کم بخت کیوں آئی، نصیبِ دشمناں ہو کر​

​

غضب تشنہ لبی تھی، خنجرِ پُرآب بھی آخر​

نکل آیا دہانِ زخم سے سوکھی زباں ہو کر​

​

اگر اہلِ نظر دیکھیں حُسین اب بھی نظر آئیں​

کہ ہم چشموں کی آنکھوں میں بسے ہیں پُتلیاں ہو کر​

​

خدا کی شان کے صدقے، جنابِ حُر کی یہ حرمت​

ارم میں چین کرتے ہیں ارم کے پاسباں ہو کر​

​

ستم ہے، ظلم ہے، حضرت کا سر ہو نوکِ نیزہ پر​

یہی کانٹا کھٹکتا ہے مرے دل میں سناں ہو کر​

​

یزیدِ بدمقدر آج بھی مردودِ عالم ہے​

سبک سب کی نگاہوں میں ہوا بارِ گراں ہو کر​

​

امامِ دوسرا کا کس طرح دیدار حاصل ہو​

مزا ہو گر نظر آ جائیں مجھ پر مہرباں ہو کر​

​

جو اہلِ قافلہ تھے، کربلا پہونچے، نجف پہونچے​

فقط میں رہ گیا ہوں اک غبارِ ناتواں ہو کر​

​

بڑھاپے میں، وطن سے دور کیوں اے شاد آ بیٹھے​

زباں بھی بھول جاؤ گے یہاں اہلِ زباں ہو کر​

​

(منشی للتا پرشاد 'شاد' میرٹھی)​

× بِن (فارسی) بہ معنی اولاد۔ بِن (ہندی) بہ معنی بغیر، بلا۔​

 

[سید زبیر]

بہت خوب!سبحان اللہ
یہ آخر کیا کرشمہ تھا کہ گُل ہائے رسول اللہ
خزاں میں جا پھنسے، گلچیں کے ہاتھوں، باغباں ہو کر
جزاک اللہ

 

[سیدہ شگفتہ]

بہت عمدہ

 

[مدیحہ گیلانی]

واہ بہت عمدہ کلام ہے۔