سیرِ گلشن کون دیکھے دشتِ طیبہ چھوڑ کر : - مولانا حسن رضا خان رحمۃاللہ علیہ

[مہ جبین]

سیرِ گلشن کون دیکھے دشتِ طیبہ چھوڑ کر​

سوئے جنت کون جائے در تمہارا چھوڑ کر​

​

سرگزشتِ غم کہوں کس سے تیرے ہوتے ہوئے​

کس کے در پر جاؤں تیرا آستانہ چھوڑ کر​

​

بے لقائے یار اُن کو چین آجاتا اگر​

بار بار آتے نہ یوں جبریل سدرہ چھوڑ کر​

​

کون کہتا ہے دلِ بے مدعا ہے خوب چیز​

میں تو کوڑی کو نہ لوں اُن کی تمنا چھوڑ کر​

​

مَر ہی جاؤں میں اگر اس در سے جاؤں دوقدم​

کیا بچے بیمارِ غم قربِ مسیحا چھوڑ کر​

​

کس تمنا پر جئیں یارب اسیرانِ قفس​

آچکی بادِ صبا باغِ مدینہ چھوڑ کر​

​

بخشوانا مجھ سے عاصی کا روا ہوگا کسے​

کس کے دامن میں چھپوں دامن تمہارا چھوڑ کر​

​

خلد کیسا نفسِ سرکش جاؤں گا طیبہ کو میں​

بد چلن ہٹ کر کھڑا ہو مجھ سے رستہ چھوڑ کر​

​

ایسے جلوے پر کروں میں لاکھ حوروں کو نثار​

کیا غرض کیوں جاؤں جنت کو مدینہ چھوڑ کر​

​

حشر میں ایک ایک کا منھ تکتے پھرتے ہیں عدو​

آفتوں میں پھنس گئے اُن کا سہارا چھوڑ کر​

​

مَر کے جیتے ہیں جو اُن کے در پہ جاتے ہیں حسن​

جی کے مَرتے ہیں جو آتے ہیں مدینہ چھوڑ کر​

​

حضرت مولانا حسن رضا خان بریلوی رحمۃاللہ علیہ​

 

[جنید اقبال]

بخشوانا مجھ سے عاصی کا روا ہوگا کسے
کس کے دامن میں چھپوں دامن تمہارا چھوڑ کر

سبہان اللہ کمال کا انتخاب کیا آپ نے

 

[سید زبیر]

مَر ہی جاؤں میں اگر اس در سے جاؤں دوقدم
کیا بچے بیمارِ غم قربِ مسیحا چھوڑ کر
سبحان اللہ ۔ ۔ سبحان اللہ ۔۔
آفتوں میں پھنس گئے اُن کا سہارا چھوڑ کر ۔ جزاک اللہ

 

[مہ جبین]

بخشوانا مجھ سے عاصی کا روا ہوگا کسے
کس کے دامن میں چھپوں دامن تمہارا چھوڑ کر

سبہان اللہ کمال کا انتخاب کیا آپ نے

مَر ہی جاؤں میں اگر اس در سے جاؤں دوقدم
کیا بچے بیمارِ غم قربِ مسیحا چھوڑ کر
سبحان اللہ ۔ ۔ سبحان اللہ ۔۔
آفتوں میں پھنس گئے اُن کا سہارا چھوڑ کر ۔ جزاک اللہ

جنید اقبال بھائی اور سید زبیر بھائی
بہت شکریہ نعت کی پسندیدگی کا

جزاکم اللہ

 

[انعام اعظمی]

ماشاءاللہ،
مرہی جاؤں میں اگر اس در سے جاؤں دو قدم
کیا بچے بیمارِ غم، قربِ مسیحا چھوڑ کر..
جزاک اللہ خیرا بھائی یہ نعت شریف پیش کرکے آپ نے یادِ مدینہ میں تڑپا دیا.
غالباً داغ دہلوی نے کہا تھا کہ میرا سارا کلام لے لیں اور یہ شعر میرے نام کردیں.
ع۔
مَر کے جیتے ہیں جو اُن کے در پہ جاتے ہیں حسن
جی کے مَرتے ہیں جو آتے ہیں مدینہ چھوڑ کر

 

[ابو المیزاب اویس]

ایک ایک شعر بہترین ہے
سبحان اللہ