چیئرمین سنی اتحاد کونسل صاحبزادہ فضل کریم چل بسے
Monday 15 April 2013
سربراہ سنی اتحاد کونسل ریلی سے خطاب کرتے ہوئے یادگار تصویر۔ فائل فوٹو
فیصل آباد: سنی اتحاد کونسل کے سربراہ اور مذہبی رہنما صاحبزادہ فضل کریم پیر کو فیصل آباد میں انتقال کر گئے۔
وہ جگر کے عارضے میں مبتلا تھے اور 4 اپریل سے فیصل آباد کے الائیڈ اسپتال میں زیر علاج تھے۔
سنی اتحاد کونسل کے چیئرمین کی عمر 59 سال تھی اور وہ ایک اہم مذہبی رہنما تصور کیے جاتے تھے۔
انہوں نے اپنے سیاسی کیریئر کا آغاز مسلم لیگ نواز کے پلیٹ فارم سے کیا اور پارٹی کے ٹکٹ پر فیصل آباد سے رکن قومی اسمبلی منتخب بھی ہوئے۔
بعد میں انہوں نے جمیعت علمائے پاکستان اور پھر سنی اتحاد کونسل میں شمولیت اختیار کر لی تھی۔
انہوں نے خود کش حملوں کو غیر اسلامی قرار دینے کے ساتھ ساتھ لاہور کے داتا دربار سوات کی طالبہ ملالہ یوسفزئی پر حملے کی مذمت کرتے ہوئے دہشت گردوں کیخلاف کارروائی کا مطالبہ کیا تھا۔
ان کی نماز جنازہ منگل کی صبح دس بجے ادا کی جائے گی۔
مسلم لیگ ن کے سربراہ میاں محمد نواز شریف نے ان کے انتقال پر گہرے دکھ اور افسوس کا اظہار کرتے ہوئے ان کے اہلخانہ سے تعزیت کا اظہار کیا ہے اور ان کی بلندی درجات کیلیے دعا کی۔
