صاحبزادہ میکش : شرابِ ناب کو دو آتشہ بنا کے پلا

[سید زبیر]

شرابِ ناب کو دو آتشہ بنا کے پلا​

پلانے والے نظر سے نظر ملا کے پلا​

​

کہیں نگاہ کی مستی بھی حل نہ ہوجائے​

کہ جام مے کی طرف سے نظر ہٹا کے پلا​

​

جھلک رہا تھا تبسم بھی ساغر مے میں​

پھر ایک بار اسی طرح مسکرا کے پلا​

​

پلا ہر ایک کو، ہر ایک پر نوازش کر​

مگر یہ شرط ہے پہلے مجھے پلا کے پلا​

​

شرابِ نغمہ بھی بہتی رہے فضاوں میں​

کلامِ حافظ و خیام گنگنا کے پلا​

​

کچھ امتیاز رہے میکدے میں میکش کا​

لبوں سے اپنے ہراک جام کو لگا کے پلا​

صاحبزادہ میکش

​

 

[نیرنگ خیال]

واہ واہ۔۔۔ عزیز میاں نے "ہائے کمبخت تو نے پی ہی نہیں" میں اس کے کچھ اشعار پڑھے ہیں۔۔ شاعر کا نام معلوم نہ تھا۔۔ بہت عمدہ سر۔۔
اس حسن انتخاب پر بہت سی داد قبول فرمائیے۔

 

[نایاب]

ساقی تیرا میکدہ سدا آباد رہے ۔۔۔۔
بہت خوب انتخاب
عزیز میاں مرحوم اکثر ان کا کلام پڑھتے تھے ۔ اور تکرار سے سماں باندھ دیتے تھے ۔

 

[امجد علی راجا]

بہت خوب انتخاب ۔ شکریہ زبیر بھیا!

 

[عمران اسلم]

شرابِ نغمہ بھی بہتی رہے فضاوں میں
کلامِ حافظ و خیام گنگنا کے پلا

کیا مطالبہ ہے۔ زبردست اور لاجواب۔
بہت شکریہ جنابِ من۔

 

[باباجی]

بہت خوب کلام
بہت شکریہ سید صاحب شیئر کرنے کا اور ٹیگ کرنے کا

کہیں نگاہ کی مستی بھی حل نہ ہوجائے​

کہ جام مے کی طرف سے نظر ہٹا کے پلا​

 

[عسکری]

بری بات شراب حرام ہے

 

[محمد وارث]

لاجواب۔ بہت شکریہ سید صاحب خوبصورت غزل ارسال فرمانے کیلیے