ایاز صدیقی عمر بھر غم سے توانائی بہم کرتے رہے

[مہ جبین]

عمر بھر غم سے توانائی بہم کرتے رہے​

جو زمانے سے نہ ہو پایا وہ ہم کرتے رہے​

​

چھن گئے تھے ہم سے قرطاس و قلم تو کیا ہوا​

آنسوؤں سے داستانِ غم رقم کرتے رہے​

​

ہم وہ آشفتہ مزاجِ بزمِ امکاں ہیں کہ جو​

زیست زیرِ سایہء دیوارِ غم کرتے رہے​

​

عمر بھر رکھی نفس کی آمدہ شد پر نظر​

گلشنِ ہستی سے ہم سیرِ عدم کرتے رہے​

​

وقت اُن کی راہ میں حائل رہا جو کم سواد​

وقت کے آگے سرِ تسلیمِ خم کرتے رہے​

​

پانے والوں نے نشانِ راہِ منزل پالیا​

ہم فقط پیمائشِ نقشِ قدم کرتے رہے​

​

اُس ستمگر کے لئے ہم اور کیا کرتے ایاز​

ہر ستم پر شکر لازم تھا سو ہم کرتے رہے​

​

ایاز صدیقی​

​

​

 

[قرۃالعین اعوان]

بہت خوب!

 

[پپو]

اُس ستمگر کے لئے ہم اور کیا کرتے ایاز
ہر ستم پر شکر لازم تھا سو ہم کرتے رہے

 

[سید زبیر]

ہم وہ آشفتہ مزاجِ بزمِ امکاں ہیں کہ جو
زیست زیرِ سایہء دیوارِ غم کرتے رہے
واہ ۔ ۔ ۔ لا جواب

 

[الشفاء]

اُس ستمگر کے لئے ہم اور کیا کرتے ایاز
ہر ستم پر شکر لازم تھا سو ہم کرتے رہے
واہ۔ واہ۔ زبردست کلام۔ بہترین انتخاب۔۔۔