جی بالکل آپ کے خلوص اور احساس کی قدر کرتا ہوں ۔برادرِ عزیز ، آج کی عالمی سیاست کے ڈھنگ نرالے ہیں۔ امریکہ کسی ملک پر اپنا کنٹرول رکھنے کی نیت سے جنگ لڑتا ہے نہ اس پر قبضہ کرنا اس کا مقصد ہوتا ہے۔ اسی تناظر میں آپ امریکی انتظامیہ کا مؤقف دیکھ سکتے ہیں جب وہ کہتے ہیں کہ ہم 2014 میں افغانستان سے چلے جائیں گے حالانکہ نہ تو وہ اس مقصد کا پا سکے جس کے لئے وہ یہاں آ سکے اور نہ ہی انہیں عراق سے WMD مل سکے تھے لیکن پھر بھی وہ وہاں سے نکل گئے۔امریکہ کا مقصد ہوتا ہے ان ممالک کو اس حد تک مفلوج کرنا کہ وہ اس کے دستِ نگر رہیں اور جب اس کا یہ مقصد پورا ہو جاتا ہے وہ اس ملک سے افواج نکال لیتا ہے اور اس کی تعمیرِ نو کے نام پر وہاں اپنی کمپنیوں کو داخل کر دیتا ہے جو وہاں کے انفراسٹرکچر پر قابض ہونے کے ساتھ ساتھ امریکی مفادات کے لئے اس ملک کی پالیسیوں پر انتہائی انداز میں نفوذ کرتی ہیں۔
بش سینئر کے وقت سے امریکہ نے دنیا کی بربادی کی جس پالیسی کا آغاز کیا وہ بش حکومت میں اعلی عہدوں اور وزارتوں پر فائز ملٹی نیشنل اور اسلحہ ساز کمپنیوں کے مالکان اور نمائندوں کا تیار کردہ پروگرام تھا۔ Twin Towers کی تباہی اس پروگرام کا ایک اہم حصہ تھا ۔ خود امریکی دانشور اور غیر جانبدار ذرائع بھی اس بات کا اظہار کرتے ہیں اور بعض امریکی حلقے تو اسے اسرائیل اوع یہودیوں کی ایک بڑی سازش قرار دیتے ہیں۔ اس لحاظ سے دیکھا جائے تو امریکہ جہاں جہاں بھی جنگیں لڑ رہا ہے وہاں اس کے 5 مقاصد ہیں۔ 1: ان ممالک کی معدنیات اور ذرائع بشمول تیل پر قبضہ کرنا تا کہ ان کمپنیوں کو زیادہ سے زیادہ فائدہ مل سکے۔ 2: تباہ کن ہتھیاروں سے ملکوں کو ملیا میٹ کر کے ان کی تعمیرِ نو کے لئے انہی کمپنیوں کو ٹھیکے دلانا ۔ 3: اسلحہ ساز کمپنیوں کے سست روی کے شکار کاروبار کو سنبھالا دینا جس کے لئے امریکی حکومت ہمیشہ سے ہی پڑوسی ممالک کے درمیان غلط فہمیوں کو ہوا دیتی رہتی ہے۔ ساتھ ہی ساتھ ان کمپنیوں کے تیار کردہ نئے تباہ کن ہتھیاروں کو عملی طور پر میدان جنگ میں آزمانا۔ 4: تباہ حال جنگ زدہ ممالک کو اپنے مالیاتی اداروں کے شکنجے میں جکڑنا تا کہ یہ معاشی خود کفالت کی بجائے ہمیشہ ان اداروں کے باجگزار رہیں معاشی خود کفالت تو درکنار اپنی روز مرہ استعمال کی اشیاء کے لئے بھی ان کمپنیوں کے دستِ نگر بن جائیں۔ 5: درجِ بالا اقدامات کے نتیجے میں پیدا ہونے والی صورت حال کے نتیجہ میں ان ممالک کی پالیسیوں پر اپنا تصرف بڑھانا اور ان سے اپنی مرضی کی شرائط پر تجارت کرنا (اکثر اوقات یہ شرائط دوسرے ممالک سے تعاون ختم کر دینے کی ہوتی ہیں۔ ایران پاکستان گیس پائپ لائن کا التواء اس کی بڑی مثال ہے)۔
یہ سب لکھنے کا مقصد یہ ہے کہ اس احساس کو جاگزیں کیا جائے جس کی طرف آپ نے توجہ دلائی۔کسی ملک کو یہ نہیں سمجھنا چاہئےکہ امریکہ آج میرا دوست ہے تو ہمیشہ میرا دوست ہی رہے گا۔ عربوں کو اس خول سے باہر آنے کی ضرورت ہے اور اپنے بے پناہ معدنی وسائل کی بدولت دنیا میں طاقت کے بگڑتے توازن کو درست کرنے کی ضرورت ہے۔ یہ بگڑتا توازن صرف مسلم ممالک کے لئے ہی نہیں تمام دنیا کے لئے شدید خطرہ ہے۔ سرِ دست مسلم ممالک اس کا شکار ہیں لیکن اب یہ بات دنیا بھر میں محسوس کی جانے لگی ہے کہ امریکہ اپنی پوزیشن کا ناجائز فائدہ اٹھا رہا ہے۔ پچھلے چند ماہ سے ایک غیر محسوس تبدیلی آ رہی ہے۔ اقوام متحدہ میں دنیا بھر کی اقوام کے دباؤ پر امریکہ سے ڈرون حملوں پر باز پرس کی جا رہی ہے۔ امریکہ کے اندر اس کی جنگوں پر تنقید پر بہت اضافہ ہوا ہے ۔ انٹر نیٹ کو امریکی اثر سے نکالنے پر زور دیا جا رہا ہے۔ بھارت کی طرف سے بعض سائٹوں پر پابندی سے امریکی حکومت کا تلملانا بہت کچھ سمجھاتا ہے کہ اب امریکی پالیسی سے دنیا کس حد تک عاجز آ چکی ہے۔ ایسے میں اگر ہم اتفاق کا مظاہرہ کریں گے تو شاید مستقبل کی دنیا میں اپنا کچھ مقام پیدا کر سکیں۔ یہ تو طے ہے کہ اب تبدیلی آنی ہی ہے اور امریکہ کی حیثیت بدلنے والی ہے لیکن ایسا تو برطانیہ کی حیثیت بدلتے وقت بھی ہوا تھا اور سوویت یونین کی حیثیت بدلتے وقت بھی ہوا تھا۔ لیکن ہم مسلمان اپنی اہلیت ثابت نہ کر سکے۔ اب ایک بار پھر وقت دستک دے رہا ہے ۔ باہمی سر پھٹول سے نجات حاصل کر لیں گے تو شاید کچھ آبرو کے ساتھ رہ سکیں ورنہ کل کو امریکہ نہیں تو کوئی اور ہمیں رگیدتا ہوا گزر جائے گا ۔