غزل: اپنی مرضی ہی کرو گے تم بھی ٭ روحی کنجاہی

[محمد تابش صدیقی]

اپنی مرضی ہی کرو گے تم بھی
کچھ کسی کی نہ سنو گے تم بھی

وقت سے بچ نہ سکو گے تم بھی
جو کرو گے وہ بھرو گے تم بھی

ایک آواز سنی ہے ہم نے
ایک آواز سنو گے تم بھی

آج آندھی ہو تو مٹی کی طرح
ایک دن بیٹھ رہو گے تم بھی

آج سرکار بنے بیٹھے ہو
کل کو فریاد کرو گے تم بھی

یہی ہوتا ہے یہی ہونا ہے
ایک دن ہاتھ ملو گے تم بھی

جب نکل جائے گا روحیؔ مطلب
کتنے الزام دھرو گے تم بھی
٭٭٭
روحیؔ کنجاہی​

 

[امین شارق]

آج سرکار بنے بیٹھے ہو
کل کو فریاد کرو گے تم بھی

کیا بات ہے تابش بھائی۔۔

 

[ایس ایس ساگر]

بہت خوب محمد تابش صدیقی بھائی۔
ایک عمدہ غزل شریک محفل کرنے کا شکریہ۔
سلامت رہیئے۔ آمین۔

 

[محمداحمد]

بہت خوب!