نظر لکھنوی غزل: جو راہِ حق سے طبیعت کبھی بھٹکتی ہے ٭ نظرؔ لکھنوی

[محمد تابش صدیقی]

جو راہِ حق سے طبیعت کبھی بھٹکتی ہے
مثالِ خار کوئی دل میں شے کھٹکتی ہے

جہاں بھی دیکھیے انسانیت سسکتی ہے
رُخِ حیات سے حسرت سی اک ٹپکتی ہے

جو محوِ خواب تھے دنیا سے ٹھوکریں کھائیں
کھلی جو آنکھ تو دنیا ہمیں تھپکتی ہے

جو سوچتا ہوں کہ تعمیرِ آشیاں کر لوں
معاً خیال میں بجلی سی اک چمکتی ہے

اٹھا لیا تھا ترے آستاں سے سر اپنا
تو زندگی ہے کہ اب در بدر بھٹکتی ہے

چراغِ راہ کا دیتی ہے کام منزل میں
جبیں کہ لمعۂ ایماں سے جب دمکتی ہے

تمہارے قرب کی لذت کا حال کیا ہو گا
کہ جب خیال سے دنیائے دل مہکتی ہے

تری نگاہ میں دنیائے دوں متاعِ عزیز
مری نظرؔ میں یہی شے مگر کھٹکتی ہے
٭٭٭
محمد عبد الحمید صدیقی نظرؔ لکھنوی​

 

[محمد عدنان اکبری نقیبی]

اٹھا لیا تھا ترے آستاں سے سر اپنا
تو زندگی ہے کہ اب در بدر بھٹکتی ہے

واہ واہ ،
بہت عمدہ لاجواب،

 

[عرفان سعید]

جو محوِ خواب تھے دنیا سے ٹھوکریں کھائیں
کھلی جو آنکھ تو دنیا ہمیں تھپکتی ہے

کیا ہی عمیق خیال ہے!
سبحان اللہ!