نظر لکھنوی غزل: سختیِ مرحلۂ دار تک آ پہنچا ہے٭ نظرؔ لکھنوی

[محمد تابش صدیقی]

دادا مرحوم محمد عبد الحمید صدیقی (نظرؔ لکھنوی) کی ایک غزل پیشِ خدمت ہے:

سختیِ مرحلۂ دار تک آ پہنچا ہے
طالبِ حق کسی معیار تک آ پہنچا ہے​

ساقی اک جرعہ کے اصرار تک آ پہنچا ہے
شیخ انکار سے اقرار تک آ پہنچا ہے​

نالۂ درد مرا عرش رسا ہے شاید
رحم اب قلب ستمگار تک آ پہنچا ہے​

بزم کی بزم پہ طاری ہے سکوتِ مستی
ذکر شاید نگہِ یار تک آ پہنچا ہے​

لشکرِ شر کو کوئی روکنے والا اٹھے
بڑھ کے اب تو صفِ اخیار تک آ پہنچا ہے​

مژدہ باد آبلہ پایانِ رہِ شوقِ وفا
قافلہ وادئ پرخار تک آ پہنچا ہے​

عرش والوں میں بڑی دھوم نظرؔ ہے اِمشب
کوئی مطلوب طلبگار تک آ پہنچا ہے
٭٭٭
محمد عبد الحمید صدیقی نظرؔ لکھنوی​

 

[محمد تابش صدیقی]

میں وقتاً فوقتاً دادا مرحوم کا کلام نظر لکھنوی کے ٹیگ کے تحت ڈالتا رہوں گا، احباب اس ٹیگ پر مزید کلام دیکھ سکتے ہیں۔ جزاک اللہ

 

[طارق شاہ]

بہت خوب کہی غزل
بہت ہی لطف دیا پڑھنے پر

مژدہ باد آبلہ پایانِ رہِ شوقِ وفا
بالا مصرع درست ٹائپ نہیں ہوا ہے شاید ؟
اس میں کوئی لفظ ٹائپ ہونے سے شاید رہ گیا ہے
دیکھ لیجئے

 

[محمد تابش صدیقی]

س میں کوئی لفظ ٹائپ ہونے سے شاید رہ گیا ہے
دیکھ لیجئے

پسند کے لیے شکریہ
یہ مصرع اسی طرح ہے، اس مصرع کو دوبارہ روانی سے پڑھنے کی کوشش کیجئے۔

فاعلاتن فَعِلاتن فَعِلاتن فَعِلن

 

[طارق شاہ]

تشکّر جواب کے لئے
اور میری کم نگاہی و کم رسائی پر معذرت قبول کیجئے
شاد رہیے
۔۔۔۔۔۔۔۔۔۔۔۔۔۔۔۔۔۔
تشریح :
ہو نوید اب آبلہ پایانِ رہِ شوقِ وفا

 

[محمد تابش صدیقی]

تشکّر جواب کے لئے
اور میری کم نگاہی و کم رسائی پر معذرت قبول کیجئے
شاد رہیے

معذرت کر کے شرمندہ نہ کیجئے۔ مغالطہ ہر کسی کو ہو سکتا ہے۔ اور تصحیح کی کوشش آپ کے خلوص کو واضح کرتی ہے۔

 

[سید عاطف علی]

مژدہ باد آبلہ پایانِ رہِ شوقِ وفا
قافلہ وادئ پرخار تک آ پہنچا ہے
خوب۔