غزل : عجیب ہوتی ہے وحشت شعار خاموشی - م م مغل

[فرحان محمد خان]

غزل
عجیب ہوتی ہے وحشت شعار خاموشی
بڑا ہی شور مچاتی ہے یار خاموشی

میں کس خرابۂ اظہار تک چلا آیا
چہار سمت وہی بے شُمار خاموشی

حریمِ لفظ و معانی اُجاڑ لگتا ہے
یہ کس کے لب پہ ہوئی ہے نثار خاموشی

تمام عمر غمِ یار شور کرتا ہے
اور اس کے بعد فقط ایک بار خاموشی

تمہاری نغمہ سرائی پہ کان دھرتی ہے
بہت ملول بڑی سوگوار خاموشی

سماعتوں کے جزیرے ڈبونے لگتی ہے
سمندروں کی طرح بے قرار خاموشی

میں قربتوں کے گھنے جنگلوں سے ڈرتا ہوں
خزائیں شور مچائیں بہار خاموشی

جہاں جہاں مجھے احباب کی ضرورت تھی
وہاں وہاں پہ رہی غمِ گُسار خاموشی

پھر آئنے میں خدو خال کے تکلف میں
نکھر رہی ہے مری دل فگار خاموشی

میں آب جوئے تعلق کے پاس بیٹھا رہا
نہ ہو سکی کبھی مجھ سے شمار خاموشی

سکوتِ شب کے اسالیب مختلف سے ہیں
چراغ دائرے نقطے حصار خاموشی

سخن سرائیاں دم توڑتی رہی محمودؔ
دھڑک رہی تھی مگر بار بار خاموشی ​

م م مغلؔ​

 

[محمداحمد]

خوبصورت شاعر کی خوبصورت غزل!

 

[اکمل زیدی]

بڑا ہی شور مچاتی ہے یار خاموشی

عمدہ ۔ ۔ ۔ ۔