نظر لکھنوی غزل: لغزشِ پا ترے کہنے پہ نہ چلنے سے ہوئی ٭ نظرؔ لکھنوی

[محمد تابش صدیقی]

لغزشِ پا ترے کہنے پہ نہ چلنے سے ہوئی
ساری تکلیف مجھے راہ بدلنے سے ہوئی

رات رو رو کہ کٹی شمع کی اللہ اللہ
غم زدہ کیسی یہ پروانوں کے جلنے سے ہوئی

نزع دم دیکھنے آئے مجھے طوعاً کرھاً
ایک راحت تو طبیعت نہ سنبھلنے سے ہوئی

مجھ کو تکلیف نہ پہنچی اسی باعث شاید
ان کو راحت مرے جذبات کچلنے سے ہوئی

کلکِ قدرت نے جو لکھا ہے وہ حرفِ آخر
منکشف بات یہ قسمت نہ بدلنے سے ہوئی

دل بھی اب سرد پڑا ختم ہوا جوشِ لہو
کیسی حالت یہ سب ارماں کے نکلنے سے ہوئی

شبِ فرقت کے اندھیروں میں یہ ہم نے دیکھا
روشنی کوئی نہ تاروں کے نکلنے سے ہوئی

چٹکیوں میں تھی نظرؔ اپنی بساطِ دنیا
مات افسوس کہ اک چال بدلنے سے ہوئی
٭٭٭
محمد عبد الحمید صدیقی نظرؔ لکھنوی​

 

[خالد محمود چوہدری]

چٹکیوں میں تھی نظرؔ اپنی بساطِ دنیا
مات افسوس کہ اک چال بدلنے سے ہوئی

اچھا ہے ، داد قبول کیجئے

 

[اکمل زیدی]

نزع دم دیکھنے آئے مجھے طوعاً کرھاً
ایک راحت تو طبیعت نہ سنبھلنے سے ہوئی

واہ ۔۔واہ۔۔کیا بات ہے ۔۔۔