غزل: مری غزل میں اب نہ وہ غزال ہو، تو معذرت ٭ احمد حاطب صدیقی

[محمد تابش صدیقی]

مری غزل میں اب نہ وہ غزال ہو، تو معذرت
شبیہ و عکس، نے کوئی مثال ہو، تو معذرت

کلامِ شوخ کا سبب تو اک نگاہِ شوخ تھی
دمِ سخن اب آنکھ میں ملال ہو، تو معذرت

وہی جمالِ ہم نشیں، رہا ہمیشہ دل نشیں
بس، اور کوئی صاحبِ جمال ہو ، تو معذرت

مرے خیال میں تو حُسن صرف اک خیال ہے
پہ حُسن کا کچھ اور ہی خیال ہو، تو معذرت

نگاہِ ناز کے وہ راز؟ اب نہ کہہ سکوں گا میں
کسی کے ذہن میں کوئی سوال ہو، تو معذرت

یہ حرفِ حاطبِؔ حزیں، گلہ نہیں، مگر کہیں
شکایتِ دلِ شکستہ حال ہو، تو معذرت
٭٭٭
احمد حاطب صدیقی​

 

[ظہیراحمدظہیر]

واہ! بہت خوب!
تو احمد حاطب صدیقی شاعری بھی کرتے ہیں ! اور کیا خوب کرتے ہیں ۔