غزل: چھتری لگا کے گھر سے نکلنے لگے ہیں ہم ٭ والی آسی

[محمد تابش صدیقی]

چھتری لگا کے گھر سے نکلنے لگے ہیں ہم
اب کتنی احتیاط سے چلنے لگے ہیں ہم

اس درجہ ہوشیار تو پہلے کبھی نہ تھے
اب کیوں قدم قدم پہ سنبھلنے لگے ہیں ہم

ہو جاتے ہیں اداس کہ جب دوپہر کے بعد
سورج پکارتا ہے کہ ڈھلنے لگے ہیں ہم

ایسا نہیں کہ برف کی مانند ہوں مگر
لگتا ہے یوں کہ جیسے پگھلنے لگے ہیں ہم

آئینہ دیکھنے کی ضرورت نہ تھی کوئی
خود جانتے تھے ہم کہ بدلنے لگے ہیں ہم

اس کا یقین آج بھلا کس کو آئے گا
اک دھیمی دھیمی آنچ میں جلنے لگے ہیں ہم

سچ پوچھیے تو اس کی ہمیں خود خبر نہیں
موسم بدل گیا کہ بدلنے لگے ہیں ہم
٭٭٭
والی آسی​

 

[محمد خلیل الرحمٰن]

خوبصورت غزل

 

[ایس ایس ساگر]

چھتری لگا کے گھر سے نکلنے لگے ہیں ہم
اب کتنی احتیاط سے چلنے لگے ہیں ہم

اس درجہ ہوشیار تو پہلے کبھی نہ تھے
اب کیوں قدم قدم پہ سنبھلنے لگے ہیں ہم

ہو جاتے ہیں اداس کہ جب دوپہر کے بعد
سورج پکارتا ہے کہ ڈھلنے لگے ہیں ہم

ایسا نہیں کہ برف کی مانند ہوں مگر
لگتا ہے یوں کہ جیسے پگھلنے لگے ہیں ہم

آئینہ دیکھنے کی ضرورت نہ تھی کوئی
خود جانتے تھے ہم کہ بدلنے لگے ہیں ہم

اس کا یقین آج بھلا کس کو آئے گا
اک دھیمی دھیمی آنچ میں جلنے لگے ہیں ہم

سچ پوچھیے تو اس کی ہمیں خود خبر نہیں
موسم بدل گیا کہ بدلنے لگے ہیں ہم

خوبصورت اشعار سے آراستہ عمدہ غزل۔ بہت خوب۔

 

[شمشاد]

اس کا یقین آج بھلا کس کو آئے گا
اک دھیمی دھیمی آنچ میں جلنے لگے ہیں ہم

عمدہ کلام، شریک محفل کرنے کا شکریہ۔

 

[ظہیراحمدظہیر]

بہت خوب! اعلیٰ! کیا اچھے اشعار ہیں !

سچ پوچھیے تو اس کی ہمیں خود خبر نہیں
موسم بدل گیا کہ بدلنے لگے ہیں ہم
واہ!
اچھا انتخاب ہے تابش بھائی۔ پڑھوانے کے لئے بہت شکریہ ۔

 

[طارق شاہ]

ایسا نہیں کہ برف کی مانند ہوں مگر


ایسا نہیں کہ برف کی مانند ہیں مگر
لگتا ہے یوں کہ جیسے پگھلنے لگے ہیں ہم

 

[سید عاطف علی]

ایسا نہیں کہ برف کی مانند ہوں مگر

ہو سکتا ہے کہ یہ ہُوں نہیں بلکہ ہوں ہو۔ (یعنی "ہو" کی جمع)

 

[سید عاطف علی]

البتہ یہ چھتری لگا کے نکلنا عجیب لگا ۔ چھتری اٹھانا تو ٹھیک لگتا ہے ۔ کچھ لوگ تو ٹوپی لگانا بھی کہتے ہیں ۔

 

[محمد تابش صدیقی]

ایسا نہیں کہ برف کی مانند ہوں مگر


ایسا نہیں کہ برف کی مانند ہیں مگر
لگتا ہے یوں کہ جیسے پگھلنے لگے ہیں ہم

یہ ہُوں نہیں ہے۔
کتاب سے عکس

 

[محمد تابش صدیقی]

البتہ یہ چھتری لگا کے نکلنا عجیب لگا ۔ چھتری اٹھانا تو ٹھیک لگتا ہے ۔ کچھ لوگ تو ٹوپی لگانا بھی کہتے ہیں ۔

کتاب میں اسی طرح ہے۔

 

[سید عاطف علی]

کتاب میں اسی طرح ہے۔

اعتراض نہیں تبصرہ ہے ۔

 

[سید عاطف علی]

آزادیء اظہار کا ویسے ہی خفیہ چرچا ہے ۔

 

[طارق شاہ]

ہو سکتا ہے کہ یہ ہُوں نہیں بلکہ ہوں ہو۔ (یعنی "ہو" کی جمع)

ایسا نہیں کہ

ایک یقینی امر کا بیان ہے اس لئے
ہو
یا اسی معنٰی میں
ہوں (قیاسی کلمہ)
نہیں آسکتا

 

[سید عاطف علی]

ایسا نہیں کہ
ایک یقینی امر کا بیان ہے اس لئے
ہو
یا اسی معنٰی میں
ہوں (قیاسی کلمہ)
نہیں آسکتا

شاعری میں شاعر یقین پر زور (یا کوئی معنوی زاویہ ) دینے کے لیے بھی بسا اوقات اس کو مشکوک کرسکتا ہے ۔ یہ شاعرانہ انداز بیان کے پہلؤوں میں سے ایک انداز ہو سکتا ہے ۔ مجھے یہی لگا کہ شاعر یہاں "ہوں" دوسرے مصرع والے "ہم" ہی کے لیے لایا ہے ۔
دوسرے یہ کہ "ایسا نہیں کہ" کے ساتھ یہ "ہوں" قیاسی نہیں رہتا ۔ (ہوں کی کئی اور صورتیں بھی ہو سکتی ہیں مثلاََ شرطیہ (جو فقرے یا مصرع کی بقیہ لفظی نشست سے طے ہو گی)
واللہ اعلم ۔یہ میری ایک رائے ہے ۔

 

[طارق شاہ]

ہوسکتا ہے
پر کیا بات کی جاسکتی ہے

بہت کچھ ہوسکتا ہے

جرمِ کاتب بھی
ہوسکتا ہے

امثال سے ہی کہا جاسکتا ہے کہ شتر گربہ، یا تضاد نہیں ہے یا ایسا روا تھا اس وقت
(ہوسکتا ہے بطنِ شاعر والے محاورہ کو تقویت دینے والا کلمہ بھی ہے)

 

[ظہیراحمدظہیر]

ایسا نہیں کہ (ہم) برف کی مانند ہوں مگر ۔ لگتا ہے یوں کہ جیسے پگھلنے لگے ہیں ہم
ایسا نہیں کہ (ہم) برف کی مانند ہیں مگر ۔ لگتا ہے یوں کہ جیسے پگھلنے لگے ہیں ہم

قاری کے نقطۂ نظر سے مجھے تو دونوں صورتوں میں کوئی فرق نظر نہیں آتا ۔دونوں اشعار کا ایک ہی مطلب بنتا ہے ۔ دونوں صورتوں میں پہلے مصرع کا فاعل "ہم" مستور ہے چنانچہ میری رائے میں شتر گربہ کا سوال تو نہیں اٹھنا چاہئے۔ ۔ عام بول چال میں بھی دونوں اسلوب روا ہیں ۔
ویسے اس شعر کا مجموعی تاثر ہی استعجابیہ ہے کہ جس میں قدرے ابہام کا انداز اختیار کیا گیا ہے: (ہمیں ) لگتا ہے یوں کہ جیسے پگھلنے لگے ہیں ہم ۔ (دنیا کو) لگتا ہے یوں کہ جیسے پگھلنے لگے ہیں ہم ۔ (انہیں ) لگتا ہے یوں کہ جیسے پگھلنے لگے ہیں ہم ۔ وغیرہ
شاعر بعض اوقات صیغوں کے استعمال میں ابہام سے کام لیتا ہے اور شاعری میں اس طرح کا مبہم اسلوب نسبتاً عام ہے ۔ مندرجہ ذیل شعر میں بھی ابہامی انداز استعمال کیا گیا ہے۔
(ہم) ہو جاتے ہیں اداس کہ جب دوپہر کے بعد
سورج پکارتا ہے کہ ڈھلنے لگے ہیں ہم
اب سوال یہ ہے کہ مصرع ثانی میں "ڈھلنے لگے ہیں ہم" کے الفاظ سورج اپنے لئے کہہ رہا ہے یا شاعر کے لئے؟! ۔ اگر شاعر کے لئے کہہ رہا ہے تو پھر "ڈھلنے لگے ہو تم" ہونا چاہئے ۔ اگر اپنے لئے کہہ رہا ہے تو پھر "ڈھلنے لگا ہوں میں" ہونا چاہئے ۔ لیکن اس ابہام کے باوجود شعر بالکل ٹھیک ہے اور اپنے معنی اور تاثر کا پورا پورا ابلاغ کرتا ہے ۔
واللہ اعلم بالصواب ۔