غزل --- کہیں کہیں سے رِدائے انا ، رفو کر لوں--- اصلاح کے لئے

[کاشف اسرار احمد]

ایک غزل اصلاح کے لئے پیش کر رہا ہوں۔
استاد محترم جناب الف عین سر سے اصلاح کی درخوست ہے۔
دیگر احباب کی آراء کا بھی منتظر رہونگا۔
بحر مجتث مثمن مخبون محذوف
مفاعلن فعلاتن مفاعلن فعلن
---------------------------------
غمِ حیات اگر وقت دے تو میں خود سے
طویل بات نہیں تھوڑی گفتگو کر لوں

اذیّتوں کے زمانے تھے جب یہ حسرت تھی
میں اپنی ذات کو گم کر کے خود کو تُو کر لوں

یہ ممکنات کی دنیا ہے اس میں حیرت کیا
میں اُس کو دوست کروں آج، کل عدو کر لوں

اگر یہ خوئے ملامت مجھے اجازت دے
کہیں کہیں سے رِدائے انا ، رفو کر لوں

ہمارے پاس وسائل ہیں صرف گنتی کے
جہاں سے پانی پیوں میں وہیں وضو کر لوں

قلم سے لفظ ٹپکتے ہیں بن کے آبِ حیات
میں کاش ان کی روانی کو آب جو کر لوں

جو سب سے سخت سزا تھی، مرا نصیب ہوئی
میں جس کو پا نہ سکوں اس کی آرزو کر لوں

لو اختیار گیا خود پہ ہاتھ سے کاشف
پھر اس کو یاد کروں دل لہو لہو کر لوں

سیّد کاشف
-------------------------​

 

[محمدابوعبداللہ]

آداب۔
آپریشن تو اساتذہ ہی کریں گے۔ منتظر ہیں ہم بھی۔

آرضو

ٹائپو ہو گا شاید،

 

[کاشف اسرار احمد]

جی۔
شکریہ۔ درست کر دیا ہے۔
نوازش۔

 

[عباد اللہ]

خوبصورت کلام ہے اور اس مصرعے کے تو کیا کہنے

یہ ممکنات کی دنیا ہے اس میں حیرت کیا

​

​

ر​

 

[کاشف اسرار احمد]

شکریہ جناب

 

[محمد تابش صدیقی]

یہ ممکنات کی دنیا ہے اس میں حیرت کیا
میں اُس کو دوست کروں آج، کل عدو کر لوں

اگر یہ خوئے ملامت مجھے اجازت دے
کہیں کہیں سے رِدائے انا ، رفو کر لوں

بہت خوب کاشف بھائی.
بہت عرصے بعد چکر لگایا. مگر خوبصورت غزل کے ساتھ.

 

[محمدابوعبداللہ]

عجب بات ہے کہ تم بھی شریک غم ٹھہرے

پھر اس کو یاد کروں دل لہو لہو کر لوں

 

[کاشف اسرار احمد]

بہت خوب کاشف بھائی.
بہت عرصے بعد چکر لگایا. مگر خوبصورت غزل کے ساتھ.

جزاک اللہ بھائی.
گرمی اور رمضان دونوں مزاج پوچھ رہے ہیں. اس لئے طبیعت بھی کچھ مائل نہیں ہو رہی. کئی غزلیں شروع کیں لیکن زیادہ تر ادھوری ہیں. موسم بدلے تو شاید موڈ بھی بدلے!

 

[صفی حیدر]

جو سب سے سخت سزا تھی، مرا نصیب ہوئی ​

میں جس کو پا نہ سکوں اس کی آرزو کر لوں
بہت لاجواب ۔۔۔۔۔۔۔۔۔ ​

 

[کاشف اسرار احمد]

عجب بات ہے کہ تم بھی شریک غم ٹھہرے

اللہ آپ کو کم از کم میرا شریکِ غم نہ کرے. آمین. آپ کے ساتھ خیر کا معاملہ ہو.

 

[کاشف اسرار احمد]

جو سب سے سخت سزا تھی، مرا نصیب ہوئی
میں جس کو پا نہ سکوں اس کی آرزو کر لوں
بہت لاجواب ۔۔۔۔۔۔۔۔۔ ​

نوازش جناب کی۔

 

[حسن محمود جماعتی]

ہمارے پاس وسائل ہیں صرف گنتی کے
جہاں سے پانی پیوں میں وہیں وضو کر لوں

بہت ہی خوبصورت کلام دل موہ لیا ہے۔۔۔۔ ڈھیروں داد۔۔

 

[کاشف اسرار احمد]

بہت ہی خوبصورت کلام دل موہ لیا ہے۔۔۔۔ ڈھیروں داد۔۔

شکریہ بھائی۔

 

[کاشف اسرار احمد]

استاد محترم جناب الف عین سر ۔
اصلاح کا منتظر ہوں جناب ۔

 

[الف عین]

بہت خوب۔ بس مقطع کا پہلا مصرع روانی چاہتا ہے۔ مطلع بھی کہہ دو تو اس غزل کو ’سمت‘ میں شامل کر دوں

 

[محمدابوعبداللہ]

اللہ آپ کو کم از کم میرا شریکِ غم نہ کرے. آمین. آپ کے ساتھ خیر کا معاملہ ہو.

ہا ہا ہا۔
ہم آپ کے میں برابر کے شریک ہیں

 

[کاشف اسرار احمد]

استاد محترم
حکم کے مطابق غزل میں تبدیلی کر دی ہے اور اس بار مطلع بھی شامل کر دیا ہے۔ آپ کی رائے کا منتظر ہوں.
جزاک اللّہ

میں داغ دل کے چلو سب کے روبرو کر لوں
سجاؤں کرب سے چہرے کو، ہاؤ ہو کر لوں

غمِ حیات اگر وقت دے تو میں خود سے
طویل بات نہیں تھوڑی گفتگو کر لوں

اذیّتوں کے زمانے تھے جب یہ حسرت تھی
میں اپنی ذات کو گم کر کے خود کو تُو کر لوں

یہ ممکنات کی دنیا ہے اس میں حیرت کیا
میں اُس کو دوست کروں آج، کل عدو کر لوں

اگر یہ خوئے ملامت مجھے اجازت دے
کہیں کہیں سے رِدائے انا رفو کر لوں

ہمارے پاس وسائل ہیں صرف گنتی کے
جہاں سے پانی پیوں میں وہیں وضو کر لوں

قلم سے لفظ ٹپکتے ہیں بن کے آبِ حیات
میں کاش ان کی روانی کو آب جو کر لوں

جو سب سے سخت سزا تھی، مرا نصیب ہوئی
میں جس کو پا نہ سکوں اس کی آرزو کر لوں

لو اپنے ہاتھ سے کاشف پھر اختیار گیا
پھر اس کو یاد کروں دل لہو لہو کر لوں

سیّد کاشف​

 

[محمد تابش صدیقی]

میں داغِ دل کو چلو سب کے روبرو کر لوں
سجاؤں کرب سے چہرے کو، ہاؤ ہو کر لوں

کیا خوب مطلع جوڑا ہے جناب۔ کیا کہنے۔

 

[کاشف اسرار احمد]

کیا خوب مطلع جوڑا ہے جناب۔ کیا کہنے۔

نوازش
لیکن ایک معمولی سی تبدیلی کی ہے !

میں داغ دل کے چلو سب کے روبرو کر لوں
سجاؤں کرب سے چہرے کو، ہاؤ ہو کر لوں

 

[حنیف خالد]

بہت خوب کاشف بھائی ۔۔