لیاقت علی عاصم غزل ۔ کیسی مہک کہاں کا کوئی پھول باغ میں ۔ لیاقت علی عاصم

[محمداحمد]

غزل

کیسی مہک کہاں کا کوئی پھول باغ میں
بس رنگِ بے وفائی ہے مقبول باغ میں

آنکھوں پہ ہاتھ رکھ کے نکلنا پڑا مجھے
اک یاد نے اڑائی بہت دھول باغ میں

تتلی کو ڈھلتے دیکھنا جگنو کے رُوپ میں
میرا یہی ہے روز کا معمول باغ میں

جانے وہ حُسن تھا کہ ہوس تھی نگاہ میں
ہر چہرہ لگ رہا تھا مجھے پھول باغ میں

عاصمؔ رسالہ ہائے گل و برگ و بار دیکھ
قدرت نے کھول رکھا ہے سکول باغ میں

لیاقت علی عاصمؔ​

 

[کاشفی]

جانے وہ حُسن تھا کہ ہوس تھی نگاہ میں
ہر چہرہ لگ رہا تھا مجھے پھول باغ میں
بہت عمدہ!

 

[محمداحمد]

جانے وہ حُسن تھا کہ ہوس تھی نگاہ میں
ہر چہرہ لگ رہا تھا مجھے پھول باغ میں
بہت عمدہ!

شکریہ کاشفی بھائی ۔۔۔۔!