فاخرہ بتول :::: آؤ ساجن سے ملواؤں -- Fakhra Batool

[طارق شاہ]

​

فاخرہ بتول

آؤ ساجن سے مِلواؤں
بات ثواب کی لگتی ہے

رنگ گلابی، مہکا مہکا
بات گلاب کی لگتی ہے

چال صبا سے مِلتی جُلتی
بات شراب کی لگتی ہے

دیکھے زیادہ ، بولے کم کم
بات حِساب کی لگتی ہے

ہاتھ پہ رکھا ہاتھ اچانک
بات تو خواب کی لگتی ہے

اُس کا آ کر زُلف کو چُھونا
بات سراب کی لگتی ہے

سرگوشی میں کیا پُوچھا تھا
بات حِجاب کی لگتی ہے

پل میں رُوٹھے، پل میں مانے
بات، جناب کی لگتی ہے

اُس کا ہجر بتاؤ کیسا
بات عذاب کی لگتی ہے

آدھا چندا ، آدھا بادل
بات نقاب کی لگتی ہے

تھوڑا تھوڑا سا ہرجائی
بات تو آپ کی لگتی ہے

فاخرہ بتول​

 

[عندلیب]

دیکھے زیادہ ، بولے کم کم
بات حِساب کی لگتی ہے
واہ واہ بہت خوب ۔۔

 

[عمر سیف]

بہت خوب ۔۔

 

[فلک شیر]

سبحان اللہ۔
ایک شاعر دوست نے مجھے بتایا تھا، کہ محترمہ فاخرہ بتول بھی آخر کو شادی کی نذر ہوئیں۔
شاہ صاحب شاید بتا سکیں، کہ آج کل محترمہ لکھ رہی ہیں یا ؟

 

[طارق شاہ]

سبحان اللہ۔
ایک شاعر دوست نے مجھے بتایا تھا، کہ محترمہ فاخرہ بتول بھی آخر کو شادی کی نذر ہوئیں۔
شاہ صاحب شاید بتا سکیں، کہ آج کل محترمہ لکھ رہی ہیں یا ؟

جناب فلک شیر صاحب!
بہت عرصے سے ان کی کوئی نئی تخلیق نظر سے نہیں گزری، آپ کے دوست کا کہا درست
ہی نظر آتا ہے، بہت کم ایسا ہوتا ہے کہ ہم خیال یا ہم پلہ و پیشہ شخصیات ازدواجی زندگی
میں بندھے ہوں ، الله کرے صحت مند اور خوش ہوں اور ہنوز لکھتی ہوں

غزل پر اظہار خیال اور پذیرائی سے زیادہ آپ سے بات کرکے خوشی ہوئی
تشکّر ، بہت خوش رہیں

 

[فلک شیر]

جناب فلک شیر صاحب!
بہت عرصے سے ان کی کوئی نئی تخلیق نظر سے نہیں گزری، آپ کے دوست کا کہا درست
ہی نظر آتا ہے، بہت کم ایسا ہوتا ہے کہ ہم خیال یا ہم پلہ و پیشہ شخصیات ازدواجی زندگی
میں بندھے ہوں ، الله کرے صحت مند اور خوش ہوں اور ہنوز لکھتی ہوں

غزل پر اظہار خیال اور پذیرائی سے زیادہ آپ سے بات کرکے خوشی ہوئی
تشکّر ، بہت خوش رہیں

سررر!!!

 

[افسر خان]

مزا آیا۔۔۔

 

[امراؤ جان ادا]

سوئیٹ

 

[شیزان]

بہت عمدہ انتخاب شاہ جی

میری معلومات کے مطابق فاخرہ بتول نہ صرف شادی شدہ بلکہ بچوں والی ہیں۔۔ ان کے شوہر کا انتقال ہو چکا ہے
ابھی حال ہی میں ان کا تازہ مجموعہ کلام"اسے روکتے بھی تو کس لیے" شائع ہوا ہے
زیادہ تر فیس بک پر ہوتی ہیں۔۔ ان کا تازہ کلام فیس بک پران کے پیج پر ملاحظہ فرمائیں

 

[محمداحمد]

ہاتھ پہ رکھا ہاتھ اچانک
بات تو خواب کی لگتی ہے

بہت ہی خوب۔۔۔۔!

 

[نیرنگ خیال]

سرگوشی میں کیا پُوچھا تھا
بات حِجاب کی لگتی ہے

بہت عمدہ۔۔۔

سبحان اللہ۔
ایک شاعر دوست نے مجھے بتایا تھا، کہ محترمہ فاخرہ بتول بھی آخر کو شادی کی نذر ہوئیں۔
شاہ صاحب شاید بتا سکیں، کہ آج کل محترمہ لکھ رہی ہیں یا ؟

کرن رباب نقوی کے فیس بک پروفائل کے توسط سے ان کی تخلیقات نظر سے گزرتی رہتی ہیں۔ محترمہ اب بھی لکھتی ہیں۔ ابھی کل ہی انہوں نے ایک نوحہ لکھا ہے۔۔۔۔ جس میں شاید انہوں نے وہ عوام میں چلتے پھرتے اشعار "ہم زندہ و جاوید کا ماتم نہیں کرتے" کا جواب دیا ہے۔۔۔۔ مطلع کچھ یوں ہے۔۔۔

نیچا کبھی ھم غازی ع کا پرچم نہیں کرتے
ھم آل میں اصحاب کو مدغم نہیں کرتے

 

[ماہی احمد]

خوبصورت کلام

 

[ابن رضا]

چھوٹی بحر میں عمدہ انتخآب

مقطع غیر مقفی ہے (شاید کمپوزنگ کی چُو ک ہے)

 

[محمداحمد]

مقطع غیر مقفی ہے (شاید کمپوزنگ کی چُو ک ہے)

مضمون کے اعتبار سے تو ٹھیک ہے۔

 

[ابن رضا]

مضمون کے اعتبار سے تو ٹھیک ہے۔

جی محترم بجا بات ہے ۔ تاہم نقطہ یہ ہے کہ ہر شعر میں قافیہ خواب، سراب، جناب، شراب، حجاب و عذاب وغیرہ لیا گیا ہے جس میں حرف روی "ا" ہے اور "ب" وصل ہے لیکن صرف مقطع میں "آپ" کا "آ" بطور روی اور "پ" بطور وصل ہے جو کہ دیگر سے مماثلت نہیں رکھتا ۔ اسی لئے عرض کیا تھا۔ البتہ بطور نظمِ معرٰی کوئی عار نہیں کہ اس میں قافیے کی پابندی نہیں ہوتی۔ تاہم عنوان میں اسے غزل کہا گیا ہے

 

[محمداحمد]

جی محترم بجا بات ہے ۔ تاہم نقطہ یہ ہے کہ ہر شعر میں قافیہ خواب، سراب، جناب، شراب، حجاب و عذاب وغیرہ لیا گیا ہے جس میں حرف روی "ا" ہے اور "ب" وصل ہے لیکن صرف مقطع میں "آپ" کا "آ" بطور روی اور "پ" بطور وصل ہے جو کہ دیگر سے مماثلت نہیں رکھتا ۔ اسی لئے عرض کیا تھا۔ البتہ بطور نظمِ معرٰی کوئی عار نہیں کہ اس میں قافیے کی پابندی نہیں ہوتی

آپ کی بات سے متفق ہوں۔ میرا اشارہ کمپوزنگ کی چوک کی طرف تھا۔