ایاز صدیقی قصہء یاراں ، حدیثِ دیگراں لکھتے رہے

[مہ جبین]

قصہء یاراں ، حدیثِ دیگراں لکھتے رہے​

ہم جو لکھنا چاہتے تھے وہ کہاں لکھتے رہے​

​

دل کا ایک اک حرف ایک اک حرفِ جاں لکھتے رہے​

میری ساری زندگی کرّوبیاں لکھتے رہے​

​

قربتوں کے سر قلم کرتے رہے اہلِ قلم​

فاصلے اک دوسرے کے درمیاں لکھتے رہے​

​

اُن کی رسوائی کا ڈر حاوی رہا ہر لفظ پر​

اپنا افسانہ بنامِ دیگراں لکھتے رہے​

​

آج بزمِ غیر میں اُنکی زباں دانی کھلی​

ہم بیاضِ دل میں جن کو بے زباں لکھتے رہے​

​

ایک مدت ہم پہ ٹوٹے ہیں مصائب کے پہاڑ​

ایک مدت ہم زمیں کو آسماں لکھتے رہے​

​

عمر بھر چنتے رہے خونِ تمنا کے حروف​

عمر بھر ہم داستانِ خونچکاں لکھتے رہے​

​

غم کا طوفاں چشمِ تر میں موجزن ہوتا رہا​

ایک ایک آنسو کو بحرِ بیکراں لکھتے رہے​

​

آنسوؤں سے روشنائی اخذکی ہم نے ایاز​

خونِ دل سے قصہء عمرِ رواں لکھتے رہے​

​

ایاز صدیقی​

 

[سید زبیر]

آنسوؤں سے روشنائی اخذکی ہم نے ایاز
خونِ دل سے قصہء عمرِ رواں لکھتے رہے
کیا بات ہے ۔ ۔ واہ زبردست کلام ہے ۔ ۔ ماشا اللہ بہت خوب

 

[مدیحہ گیلانی]

واہ ..خوبصورت انتخاب ہے .

 

[زبیر مرزا]

واہ بہت خوب

 

[قرۃالعین اعوان]

لاجواب!

 

[عاطف بٹ]

واہ، بہت عمدہ۔

 

[الشفاء]

اُن کی رسوائی کا ڈر حاوی رہا ہر لفظ پر
اپنا افسانہ بنامِ دیگراں لکھتے رہے
آج بزمِ غیر میں اُنکی زباں دانی کھلی
ہم بیاضِ دل میں جن کو بے زباں لکھتے رہے


واہ۔۔۔ بہت خوب انتخاب اپیا۔۔۔
خوش رہیں۔۔۔

 

[محمداحمد]

بہت خوب انتخاب ہے!

 

[نظام الدین]

خوبصورت انتخاب ۔۔۔۔ شیئرنگ کا شکریہ