قلم ہو تیغ ہو تیشہ کہ ڈھال مت چھینو - وصی شاہ

[رانا]

قلم ہو تیغ ہو تیشہ کہ ڈھال مت چھینو
کبھی کسی سے کسی کا کمال مت چھینو

خوشی اسی میں اگر ہے تو ہر خوشی لے لو
یہ دکھ یہ درد یہ حزن و ملال مت چھینو

اسی خلش کے سبب پھر مجھے ابھرنا ہے
خدا کے واسطے عہد زوال مت چھینو

میں چھوڑ سکتا نہیں ساتھ استقامت کا
مری اذان سے جوش بلال مت چھینو

ابھی کتاب نہ چھینو تم ان کے ہاتھوں سے
ہمارے بچوں کا حسن و جمال مت چھینو

ہماری آنکھ میں یادوں کے زخم رہنے دو
ہمارے ہاتھ سے پھولوں کی ڈال مت چھینو

ابھی بجھاؤ نہ کینڈل نہ کیک کاٹو ابھی
کچھ اور دیر مرا پچھلا سال مت چھینو

 

[محمد وارث]

بجز آخری شعر کے، خوبصورت غزل ہے اور لاجواب اشعار ہیں۔ شکریہ جناب شیئر کرنے کیلیے۔

 

[رانا]

شکریہ وارث بھائی۔
مجھے بھی غزل پڑھتے ہوئے آخری شعر کچھ ایسا ہی لگا جیسے اچھے بھلے دھاری دار تیندوے پیدا ہوتے ہوتے اچانک کوئی سیاہ تیندوا پیدا ہوجائے۔

 

[کاشفی]

خوبصورت انتخاب ہے جناب رانا صاحب۔۔بیحد شکریہ۔۔