لاہور ہائیکورٹ کا یاہو،ایم ایس این، گوگل سمیت 9 ویب سائٹس بند کرنے کا حکم

[قمراحمد]

قرآن پاک میں تحریف کا الزام، لاہور ہائیکورٹ کا یاہو،ایم ایس این، گوگل سمیت 9 ویب سائٹس بند کرنے کا حکم

بہاولپور( نمائندہ جنگ) لاہور ہائی کورٹ بہاولپور بنچ نے گستاخانہ مواد کی اشاعت اور قرآن پاک میں تحریف کے الزامات پر 9ویب سائٹس یاہو، ایم ایس این، ہاٹ میل، یو ٹیوب ، گوگل ، اسلام ایکسپوزڈ، ان دا نیم آف اللہ ، امیزون اور بنگ کو فوری طور پر بلاک کرنے کا حکم دیا ہے۔ عدالت عالیہ بہاو لپور بنچ نے بہاو لپور کے ایک شہری محمد صدیق کی طرف سے دائر کردہ رٹ پٹیشن نمبر3246/2010 پر چیئرمین پی ٹی اے کو ہدایت جاری کی اور 28جون کو ریکارڈ سمیت پیش ہونے کا حکم دیا ہے۔

وفاق کی طرف سے ڈپٹی اٹارنی جنرل محمد حسین آزاد نے بھی رٹ پٹیشنر کے مٴوقف کی تائید کی۔ جسٹس مظہر اقبال کی عدالت میں مدعی کے وکیل لطیف الرحمن ایڈووکیٹ نے دلائل دیتے ہوئے کہا کہ اِن ویب سائٹس پر توہین آمیز موادموجود ہے، عدالت کو اس حوالے سے سی ڈی اور ریکارڈ بھی پیش کیا گیا، جس پر عدالت نے مذکورہ ویب سائٹس کو بلاک کرنے کا حکم دیا، ڈپٹی اٹارنی جنرل محمد حسین آزاد نے بتایا کہ انہوں نے پٹیشنر کی پٹیشن اور اس کا مطالبہ دیکھتے ہوئے عدالت میں خود استدعا کی کہ ان ویب سائٹس جن پر گستاخانہ مواد شائع کیا جارہا ہے کو فوری بلاک کیا جائے۔

انہوں نے کہا کہ ان ویب سائٹس پر اس قسم کے مواد کا شائع ہونا نہایت قابل مذمت ہے اور مسلمان ہونے کی حیثیت سے ہمارا بھی یہ فرض بنتا ہے کہ ہم اس کی جتنی مذمت کریں اتنا کم ہے۔ انہوں نے کہا کہ عدالت نے پٹیشنر اور میری استدعا پر ان ویب سائٹس کو بلاک کرنے کا حکم دیا۔ بعد ازاں صدر ہائیکورٹ بار اسلم دھکڑ نے کہا کہ عدالت نے تاریخی فیصلہ دیا ہے ، انہوں نے کہا کہ بہاو لپور کے وکلا آج مکمل ہڑتال کریں گے اوراس سلسلہ میں خصوصی اجلاس بھی طلب کرلیاہے۔

 

[فاتح]

اوہ میرے خدا۔۔۔
خدا کی قسم مجھے لگا تھا کہ یہ دھاگا مذاق میں کھولا گیا ہے مگر آج کے جنگ میں تو واقعی صفحۂ اول پر یہ خبر موجود ہے۔ واقعی "تاریخی فیصلہ" ہے۔

 

[arifkarim]

اوہ میرے خدا۔۔۔
خدا کی قسم مجھے لگا تھا کہ یہ دھاگا مذاق میں کھولا گیا ہے مگر آج کے جنگ میں تو واقعی صفحۂ اول پر یہ خبر موجود ہے۔ واقعی "تاریخی فیصلہ" ہے۔

آپ پریشان نہ ہوں۔ جلد ہی یہ علما پورا انٹرنیٹ بند کروا کر ہی دم لیں گے۔

 

[شمشاد]

اگر انٹرنیٹ پر یہی کچھ ہونا ہے تو اس سے اچھا ہے کہ اسے بند ہی کر دیا جائے اور یہ ہر مسلمان کا فرض ہے نہ کہ صرف علما کا۔

اور یہ محمد صدیق (اللہ انہیں جزا دے)، جنہوں نے یہ درخواست دی تھی، وہ ایک عام شہری ہیں کوئی جانے پہچانے عالم نہیں ہیں۔

 

[Fari]

حیرت کی بات ہے کہ سرچ انجن توصرف متعلقہ ویب سائٹ سےمواد اٹھا کے صارف کو دیتا ھے۔۔اور اصل میں جن سائٹس پر یہ مواد شائع ہوا یے ین پر کوئی بھی آنچ نہیں-