حسان خان
لائبریرین
نذرِ عقیدت
لسان العصر مولانا اکبر الٰہ آبادی کے مزار پر دو آنسو
آج کوئی حورِ قدرت کی زباں لا دے مجھے
بربطِ ناہید کا رنگیں بیاں لا دے مجھے
ہاں، بجائے خامہ تارِ کہکشاں لا دے مجھے
صفحۂ کاغذ کے بدلے آسماں لا دے مجھے
سجدہ زارِ عرش سے سجدے اٹھا لائے کوئی
بوسہ گاہِ خلد سے بوسے چرا لائے کوئی
رونے والے بادلوں سے اشکباری سیکھ لوں
برق کی بے تابیوں سے بے قراری سیکھ لوں
گیسوئے لیلائے شب سے سوگواری سیکھ لوں
سیکھ لوں اچھی طرح میں آہ و زاری سیکھ لوں
الفراق! اے صبر اب ضبطِ فغاں دشوار ہے
المدد! اے چشمِ تر اک جوئے خوں درکار ہے
آستانِ اکبرِ اعظم پہ جانا ہے مجھے
سجدہ گاہِ شاعری پر سر جھکانا ہے مجھے
پھول اک ذوقِ ارادت کا چڑھانا ہے مجھے
نغمے کی صورت میں اک آنسو بہانا ہے مجھے
آج اس در پر تخیل مائلِ نظارہ ہے
جس کا ہر ادنیٰ سا ذرہ تا فلک گہوارہ ہے
اے لسان العصر! اے 'پیرِ مغانِ شاعری'
اے کہ تو ہے آفتابِ آسمانِ شاعری
خلد ساماں تیرے نغموں سے جہانِ شاعری
تیرا اک اک لفظ ہے روحِ روانِ شاعری
'دو جہاں پیما' تری تخییل کا نظارہ ہے
تیرے دشتِ فکر میں روح الامیں آوارہ ہے
تو نے خارستانِ اردو کو گلستاں کر دیا
ریگ زارِ نظم کو جنت بداماں کر دیا
شمعِ حسنِ فکر کو مہرِ درخشاں کر دیا
خاکدانِ شاعری کو عرش ساماں کر دیا
تیرے سحرِ شاعری سے اک جہاں مسحور ہے
تیرے نغموں سے فضائے زندگی معمور ہے
بلبلِ ایراں پہ اس کے گلستاں کو فخر ہے
غالبِ مرحوم پر ہندوستاں کو فخر ہے
شکسپیئر پر مغربی پیر و جواں کو فخر ہے
گوئٹے پر سرزمینِ آلماں کو فخر ہے
تجھ پہ لیکن کل زمین و آسماں کو ناز ہے
کیا زمین و آسماں! دونوں جہاں کو ناز ہے
گلشنِ ہستی میں تیرا 'ہمنوا' کوئی نہیں
بربطِ فطرت میں تیری سی صدا کوئی نہیں
تجھ سے بڑھ کر حسنِ فطرت پر فدا کوئی نہیں
تجھ سے بہتر عشق کا درد آشنا کوئی نہیں
سازِ رنگینِ حقیقت پر نوا گستر تھا تو!
شاعری کی فلسفی دنیا کا پیغمبر تھا تو!
(اختر شیرانی)
لسان العصر مولانا اکبر الٰہ آبادی کے مزار پر دو آنسو
آج کوئی حورِ قدرت کی زباں لا دے مجھے
بربطِ ناہید کا رنگیں بیاں لا دے مجھے
ہاں، بجائے خامہ تارِ کہکشاں لا دے مجھے
صفحۂ کاغذ کے بدلے آسماں لا دے مجھے
سجدہ زارِ عرش سے سجدے اٹھا لائے کوئی
بوسہ گاہِ خلد سے بوسے چرا لائے کوئی
رونے والے بادلوں سے اشکباری سیکھ لوں
برق کی بے تابیوں سے بے قراری سیکھ لوں
گیسوئے لیلائے شب سے سوگواری سیکھ لوں
سیکھ لوں اچھی طرح میں آہ و زاری سیکھ لوں
الفراق! اے صبر اب ضبطِ فغاں دشوار ہے
المدد! اے چشمِ تر اک جوئے خوں درکار ہے
آستانِ اکبرِ اعظم پہ جانا ہے مجھے
سجدہ گاہِ شاعری پر سر جھکانا ہے مجھے
پھول اک ذوقِ ارادت کا چڑھانا ہے مجھے
نغمے کی صورت میں اک آنسو بہانا ہے مجھے
آج اس در پر تخیل مائلِ نظارہ ہے
جس کا ہر ادنیٰ سا ذرہ تا فلک گہوارہ ہے
اے لسان العصر! اے 'پیرِ مغانِ شاعری'
اے کہ تو ہے آفتابِ آسمانِ شاعری
خلد ساماں تیرے نغموں سے جہانِ شاعری
تیرا اک اک لفظ ہے روحِ روانِ شاعری
'دو جہاں پیما' تری تخییل کا نظارہ ہے
تیرے دشتِ فکر میں روح الامیں آوارہ ہے
تو نے خارستانِ اردو کو گلستاں کر دیا
ریگ زارِ نظم کو جنت بداماں کر دیا
شمعِ حسنِ فکر کو مہرِ درخشاں کر دیا
خاکدانِ شاعری کو عرش ساماں کر دیا
تیرے سحرِ شاعری سے اک جہاں مسحور ہے
تیرے نغموں سے فضائے زندگی معمور ہے
بلبلِ ایراں پہ اس کے گلستاں کو فخر ہے
غالبِ مرحوم پر ہندوستاں کو فخر ہے
شکسپیئر پر مغربی پیر و جواں کو فخر ہے
گوئٹے پر سرزمینِ آلماں کو فخر ہے
تجھ پہ لیکن کل زمین و آسماں کو ناز ہے
کیا زمین و آسماں! دونوں جہاں کو ناز ہے
گلشنِ ہستی میں تیرا 'ہمنوا' کوئی نہیں
بربطِ فطرت میں تیری سی صدا کوئی نہیں
تجھ سے بڑھ کر حسنِ فطرت پر فدا کوئی نہیں
تجھ سے بہتر عشق کا درد آشنا کوئی نہیں
سازِ رنگینِ حقیقت پر نوا گستر تھا تو!
شاعری کی فلسفی دنیا کا پیغمبر تھا تو!
(اختر شیرانی)
