جوش مابینِ بلور و سنگ - جوش ملیح آبادی

[حسان خان]

یوں مسلسل نہ دھڑک، اے دلِ سیماب آگیں​

شیشۂ نازکِ ہستی نہ دَرَک جائے کہیں​

​

تا کجا یہ سفرِ کور بہ دشتِ ظلمات​

صاف و تابندہ گماں ہے نہ درخشندہ یقیں​

​

فکرِ جویا نے وہاں نصب کیے ہیں خیمے​

کہ جہاں قصر بلوریں ہے نہ کاخِ سنگیں​

​

سرمۂ دیدۂ تاریخ، غبارِ اقوال​

غازۂ چہرۂ امروز، بخارِ دوشیں​

​

صمدیت کی جبیں پر صنمیت کے نقوش​

ذاتِ بے رنگ پہ بہتانِ صفاتِ رنگیں​

​

حسنِ مطلق میں یہ انسان مزاجی توبہ​

کبھی سفاکیِ خسرو، کبھی نازِ شیریں​

​

کبھی شمشیرِ اجل ہے، تو کبھی قوسِ حیات​

کبھی آمادۂ الطاف، کبھی بر سرِ کیں​

​

اف ری نیرنگیِ قانونِ حیاتِ گذرا‌ں​

کبھی سرپنجۂ آہن، کبھی پائے جوبیں​

​

گاہ، گل برگ کے دامن میں ہجومِ خس و خار​

گاہ، ذرات کی محراب میں رقصِ پرویں​

​

گاہ، دیہیمِ گہر بار بہ فرقِ حبشی​

گاہ، آفات کے کہسار بہ دوشِ سیمیں​

​

گلستانوں میں کبھی دبدبۂ بادِ سموم​

ریگزاروں میں کبھی تاب و تبِ دُرِّ ثمیں​

​

گاہ، شبنم کے گہرزار میں رقصندہ شرار​

گاہ، خاشاک کے انبار میں زلفِ مشکیں​

​

نَے کے سینے میں کبھی شورِ جلوسِ ماتم​

شام کے سر پہ کبھی دامنِ صبحِ زریں​

​

سینۂ یخ میں کبھی سوزِ پَرافشانیِ برق​

رگِ آہن میں کبھی نرمیِ طبعِ شیریں​

​

گاہ، ایوانِ گل و مُل ہے مقامِ فریاد​

گاہ، طوفان و تزلزل ہے محلِّ تمکیں​

​

ایک ہی روپ ہے قدرت کا، بہ فرقِ اسماء​

شام کو دستۂ گل، صبح کو دستِ گل چیں​

​

شام میں گاہ، دلِ ابنِ منافق شاداں​

کربلا میں کبھی، اولادِ پیمبر غمگیں​

​

غار میں گاہ رسالت ہدفِ بیمِ اجل​

گامزن گاہ حدیبیہ سوئے 'فتحِ مبیں'​

​

گاہ، ایک آن بھی ناقابلِ تسخیر حصار​

گاہ، صد سلسلۂ کون و مکاں زیرِ نگیں​

​

گاہ، تاریکیِ خوں خوار ہے اُم الانوار​

گاہ، بیداریِ طرار ہے خوابِ نوشیں​

​

گاہ، ایمان کا سر حاملِ تاجِ الحاد​

گاہ، ابلیس کا در مہبطِ جبریلِ امیں​

​

گاہ، پیمائشِ یک ذرہ بھی اک امرِ محال​

گاہ، پہنائیِ آفاق ہے لزمِ بالیں​

​

گاہ، گرتی ہے دھویں سے کُلہِ مہرِ منیر​

گاہ، کٹتا ہے کتاں سے جگرِ ماہِ مبیں​

​

کس کو ہے جراتِ اقرار و مجالِ انکار​

نہ تنومند کوئی 'ہاں' نہ جگر دار 'نہیں'​

​

ہیچ ہے دشنگیِ نیش و دل آویزیِ نوش​

پوچ ہے نغمۂ تحسین و غریوِ نفریں​

​

اس زمیں پر کوئی مومن ہے تو ملحد کوئی​

میں نہ مومن ہوں، نہ ملحد، نہ چناں ہوں، نہ چنیں​

​

دین پر ہے کوئی نازاں، تو کوئی دنیا پر​

مجھ سیہ بخت کی جھولی میں، نہ دنیا ہے، نہ دیں​

​

ناقدِ جبرِ طبائع کی نگاہوں کے حضور​

اولیاء ہی نہ مقدس، نہ شیاطین لعیں​

​

الاماں کشمکشِ رشتۂ موجِ انفاس​

کبھی زنجیرِ صنم خانہ، کبھی حبلِ متیں​

​

کس دوراہے پہ تفکر مجھے لے آیا ہے​

کبھی آیات نشیمن، کبھی الحاد نشیں​

​

گاہ، نظروں کو لبھاتا ہے جمالِ سقراط​

گاہ، سینے میں دمکتی ہے محمد کی جبیں​

​

رحم، اے مشعلۂ خضر و چراغِ منزل​

جوش، اندھیرے میں نہ سر پھوڑ کے مر جائے کہیں​

​

(جوش ملیح آبادی)​

 

[مہدی نقوی حجاز]

واہ۔
اس زمیں پر کوئی مومن ہے تو ملحد کوئی
میں نہ مومن ہوں، نہ ملحد، نہ چناں ہوں، نہ چنیں

میری پسندیدہ نظموں میں سے ایک ہے جناب حسان خان صاحب۔ دوبارہ پڑھوانے کا بہت شکریہ۔ آداب!​