یہ لڑی آپ نہ بناتے تو ہم بنانے ہی والے تھے ۔
محب بھائی آپ ماشا اللہ پچاس سے زیادہ کتابیں ٹائپ کروا چکے ہیں بلکہ اس کام میں باقاعدہ حصہ دار رہے ہیں ۔ اس کام کا خیال آپ کو کیسے آیا؟
مستقبل کے لیے آپ کے ٹارگٹس کیا ہیں؟
بہت اہم اور دلچسپ سوال ہے اور کوش کروں گا کہ اس کا مفصل جواب دوں اور ایک سے زیادہ پوسٹ میں دوں تاکہ لائبریری پراجیکٹ کے تین ادوار کا اجمالی خاکہ پیش کر سکوں۔ اس پوسٹ میں انتہائی مختصر اور ادھورا جواب دوں گا تاکہ اس کے تفصیلی جواب کے لیے محفل کے پرانے دھاگوں کو بھی چھان سکوں اور اس سفر میں کتابوں اور اراکین سے روشناس کروا سکوں۔
لائبریری پراجیکٹ کو تین حصوں میں تقسیم کیا جا سکتا ہے:
دور اول: 2006 تا 2008
دور دوم: 2009 تا 2013
دور سوم: 2020 تا حال
اس پوسٹ میں حالیہ دور کا ہی ذکر کروں گا جبکہ باقی ادوار کے بارے میں دیگر مراسلات میں لکھنے کی کوشش کروں گا۔ اس کام کا خیال کاش مجھے آیا ہوتا مگر یہ سعادت اور خدمت کا خیال محفل کی ہر دلعزیز، پرخلوص اور علمی شخصیت
محمد شعیب کو آیا۔ شعیب کا اردو ویکیپیڈیا سے دیرینہ تعلق ہے اور وہ مجھ سمیت بہت سے لوگوں کو اردو ویکیپیڈیا سے جوڑنے اور کام کے لیے آمادہ کرتے رہتے ہیں، اس سلسلے میں محفل پر بہت سے دھاگے ان کی پرخلوص کاوشوں کے گواہ ہیں۔ شعیب نے اردو ویکیپیڈیا پر ادب عالیہ کے فروغ کی غرض سے
کتابوں کی فہرست سازی کی تیاری شروع کی اور اس کے دوران انہیں بارہا خیال آتا رہا کہ ان کتابوں کی از سر نو اشاعت ہونی چاہیے۔ شعیب ہی کے الفاظ نقل کر رہا ہوں:
"ہندوستان کے متعدد ناشرین سے رابطہ کیا لیکن انہوں نے معقول کاروباری عذر پیش کرتے ہوئے سرمایہ کی قلت اور ان کتابوں میں خریداروں کی عدم دلچسپی کے باعث طبع نو سے معذرت کر لی۔ تب ہمیں خیال آیا کہ کیوں نہ ان کتابوں کو از سر نو ٹائپ کرکے نئے دیدہ زیب سرورق کے ساتھ آن لائن برقی شکل میں شائع کیا جائے۔
ظاہر ہے اس اعتقاد پر مبنی منصوبہ ہمہ جہت اور بے پناہ وقت اور محنتوں کا طالب تھا۔ ایک ناپختہ خیال چند دنوں میں پختہ ہوا، چھوٹی سی تحریر میں ڈھلا، دوستوں کی بے لوث محبت پر اعتماد نے کچھ ڈھارس بندھائی اور اس تحریر کو واٹس ایپ پر اپنے چند مخصوص حلقہ ہائے احباب میں پیش کیا۔ بفضل خداوندی اسے خوب پذیرائی ملی اور بلا تاخیر ایک گروپ میں منشی نہال چند لاہوری کی مذہب عشق (گل بکاؤلی) پر کام شروع ہو گیا۔"
اس وٹس ایپ گروپ کا نام مجلس ادبیات عالیہ رکھا گیا اور میں بھی اس میں شامل تھا۔ محض دس بارہ دن میں گل بکاؤلی کے ساتھ ساتھ سیر ایران بھی ٹائپ ہو گئی۔ فسانہ عجائب شروع ہوئی تو میرے مشورے پر محفل پر
اردو ادب عالیہ ٹائپنگ منصوبے کا آغاز ہوا۔ جاسمن، نور وجدان نے ابتدائی دھاگوں میں شرکت کی اور دیگر اراکین کو بھی مدعو کیا۔ خوش قسمتی سے مقدس اور شمشاد بھی واپس آ گئے اور محمد عمر، اوشو ، قرۃ العین کی شکل میں ایسے نئے ممبران ساتھ ہو گئے جو اب تک مسلسل لائبریری کی مختلف کتابوں پر کام کر رہے ہیں۔ اس کے علاوہ شعیبب نے تمام حالیہ اراکین لائبریری کی فہرست ایک لڑی میں شیئر کی ہے جسے ڈھونڈ کر تمام اراکین کے بارے میں جانا جا سکتا ہے۔
