حسان خان
لائبریرین
مرا سینہ ہے مشرق آفتابِ داغِ ہجراں کا
طلوعِ صبحِ محشر چاک ہے میرے گریباں کا
ازل سے دشمنی طاؤس و مار آپس میں رکھتے ہیں
دلِ پُرداغ کو کیونکر ہے عشق اُس زلفِ پیچاں کا
کسی خورشید رو کو جذبِ دل نے آج کھینچا ہے
کہ نورِ صبحِ صادق ہے غبار اپنے بیاباں کا
شگفتہ مثلِ گل ہر فصلِ گل میں داغ ہوتے ہیں
بنا ہے کیا ہمارا کالبد خاکِ گلستاں کا
شفق سمجھا ہے اُس کو ایک عالم وائے بے دردی
فلک کو گر بگولا جا لگا خاکِ شہیداں کا
سیہ خانہ مرا روشن ہوا ویران ہونے سے
کیا دیوار کے رخنوں نے یاں عالم چراغاں کا
وہ شوخِ فتنہ انگیز اپنی خاطر میں سمایا ہے
کہ اک گوشہ ہے صحرائے قیامت جس کے داماں کا
چمکنا برق کا لازم پڑا ہے ابرِ باراں میں
تصور چاہیے رونے میں اُس کے روئے خنداں کا
کفن کی جب سفیدی دیکھتا ہوں کنجِ مرقد میں
تو عالم یاد آتا ہے شبِ مہتابِ ہجراں کا
نہیں آتا نظر مرہم لگائے کس جگہ کوئی
دہانِ یار گویا منہ ہے میرے زخمِ پنہاں کا
دیا میرے جنازے کو جو کاندھا اُس پری رو نے
گماں ہے تختۂ تابوت پر تختِ سلیماں کا
مرا ویرانہ مثلِ آئینہ معمورِ حیرت ہے
یقیں ہر رخنۂ دیوار پر ہے چشمِ حیراں کا
جنوں میں ہجر کی شب ہاتھ دوڑایا ہے جب اپنا
کیا ہے چاک تا جیبِ سحر اپنے گریباں کا
جو سرخی آتی ہے عکسِ شفق سے بھی مرے منہ پر
حسد سے رنگ ہوتا ہے مُبدّل چرخِ گرداں کا
صریرِ کلک کو اب شیر کا نعرہ سمجھتے ہیں
یقیں اعدا کو ہے میرے قلمداں پر نیستاں کا
کسی سے دل نہ اس وحشت سرا میں میں نے اٹکایا
نہ الجھا خار سے دامن کبھی میرے بیاباں کا
تہِ شمشیرِ قاتل کس قدر بشاش تھا ناسخ
کہ عالم ہر دہانِ زخم پر تھا روئے خنداں کا
(امام بخش ناسخ)
