غزل کی اصلاح تو ہو گئی۔ اس کے باوجود میں کچھ باتیں عرض کرنا چاہوں گا۔
سینیئر اساتذہ نوجوانوں کی حوصلہ افزائی کی خاطر اپنے لہجے کو نرم سے نرم رکھنے کی کوشش کرتے ہیں۔ یہ امر ان کی شفقت کا مظہر ہوتا ہے۔ اب یہ طالب ِ علم کا فرض ہے کہ جاننے کی کوشش کرے کہ استاد نے کہاں کہاں از راہِ شفقت کوتاہیوں سے صرفِ نظر کیا ہے۔ محض اصلاح پا لینے سے ہر شعر زندہءِ جاوید نہیں ہو جاتا۔ آخر میں یہ سراسر طالبِ علم کا فرض ہے کہ وہ اپنے خونِ جگر سے شعروں کے چمن کی آبیاری کرتا رہے۔ اصلاح کے بعد بھی شعر میں بہتری لانا فقط طالبِ علم کا فرض ہے۔
میرا شمار چونکہ سینیئر اساتذہ میں نہیں ہوتا (بلکہ کسی طور اساتذہ میں شامل ہی نہیں)، اس لیے مجھے شاید زیادہ کھلے الفاظ میں غلطیوں کی نشاندہی کی اجازت ہے (چونکہ مجھ سے شفقت کی توقع نہیں)۔ پھر بھی لہجے کو "مہرباں" رکھنے کی کوشش ضرور کروں گا۔
1۔ اسا تذہ کرام نے یہاں نرم الفاظ میں مطالعہ کا مشورہ دیا ہے۔ طالبِ علم جان لے کہ اسے مطالعہ کی شدید ضرورت ہے۔ ورنہ کلام ہرگز ترقی نہ کرے گا۔
2۔ استادِ محترم
الف عین صاحب نے آخری شعر کے بارے میں فرمایا: " بس ابتذال ہے تھوڑا سا"۔نرم الفاظ استعمال کرنے کا سبب وہی جو میں نے پہلے بیان کیا۔ حقیقت میں شدید ترین ابتذال ہے۔ اس شعر کوغزل سے یک قلم خارج کرنا ہی بہتر ہے۔ایسے مضامین پہلے زمانے میں تو پھر بھی چل جانے تھے مگر اب نہیں۔ یہ عامیوں کے مضامین ہیں۔
3۔ ردیف میں "ہو" کا واو گر رہا ہے۔ اگر بیچ بیچ میں با الاضطرار ایسا ہو تو شاید جائز۔ مگر ردیف میں اس کا گرنا مناسب نہیں۔
میری دانست میں یہ اور ایسی کچھ اور باتیں ہیں جن کا جاننا ہر طالب علم کے لیےازحد ضروری ہے۔ کیا اچھا نہ ہو گا کہ اس مقصد کے لیے ایک چسپاں لڑی بنا دی جائے تا کہ مبتدی اصلاح سے پہلے اپنے کلام کو اس کسوٹی پر خود ہی پرکھ لیں۔ اگر ان حضرات کو فرصت ہو تو اس اچھے کام کے لیے میرے ذہن میں
مزمل شیخ بسمل،
محمد یعقوب آسی اور
محمد وارث کے ہی نام آ رہے کہ میں خود بھی ابھی سب کو جانتا نہیں۔
